致新手

係咪次次見到人social network打卡，都好羡慕呢，但又完全唔知應該點樣入手，身邊又無朋友可以帶去，見到啲裝備又唔知點揀好，一頭霧水中。

其實香港依家嘅camping style，只係將picnic(野餐)嘅時間延長至2D1N，但因為要過夜嘅關係，所以要準備shelter(遮蔽點)去渡過一個夜晚，所以唔一定要買好多野。

喺準備之前，就諗吓自己想過一個點樣嘅2D1N嘅picnic，有人會喺屋企整三文治放入果籃，準備張野餐墊就出去。有人會拎高枱、茶杯等去户外食afternoon tea。有人會barbecue等。唔同嘅picnic方式，要準備嘅野都唔同，可以根據手頭上有嘅資源而去決定係過一個點樣形式嘅picnic

之後就係要準備一個shelter，因為shelter作用係幫你遮風擋雨，提供一定私隱度，所以大多數人都會選擇用tent(營)黎做shelter。作為一個shelter，最緊要係安全！幾靚都無用，詳情可參考: 營的選擇

有咗shelter後，就要諗「過夜」依個問題，如果後生，都可以玩通宵唔訓睇日出，完全唔駛考慮依個問題。但老hike老了，要訓覺，所以要面對入夜後訓覺問題。面對户外過夜最大問題係地氣、溫差，所以先需要睡墊同睡袋，詳情可參考: 睡房設定

當準備好以上嘅野，就需要諗點運送啲gear去目的地，有車嘅，可以搬屋方式搬運去目的地，無車嘅，就可能會係走難方式出發，但如果目的地係要上山下海的話，用backpack(背包)係最common做法。一個好嘅backpack，絕對可以幫到你孭10-20kg都唔辛苦，一個唔啱自己嘅，孭10磅都覺得膊頭爛，至於點揀，詳情可參考: 背包的選擇

就係咁，一個2D1N嘅露營就已經可以出發了。當然，在老hike眼中，絕對建議第一次係跟朋友或上堂學吓一啲 山系禮儀 及 山野無痕 先出發。只要發揮自己想像力，窮都有窮玩法嘅。

注: 好多人話貧窮限制camping，本老hike唔同意的。以嗜好黎講camping絕對算平，美酒、跑車、相機、金錶等已經cover到camping嘅價錢。係，好多人會評論你用嘅係咪名牌，依個係資本主義社會問題黎。老hike曾經接觸golf，品牌問題更加嚴重，但當老hike under 20 handicap時，就無人再問牌子了，裝備可以幫到好多，依個係事實，但唔代表技術唔可以克服。除咗19NH外，本老hike係唔會笑人用非名牌的。

#後來轉咗枝driver打到曉飛

#巴西窮到足球都無錢買一樣出到咁多球星

#户外攻略
FB: 老hike都去camp
MeWe: 老hike都去camp