知識分享 - 柴火爐

上集講到爐具，點解要將柴火爐分開講。

因為柴火爐係一樣極度易學難精嘅東西，本老hike都係略懂皮毛，試試班門弄斧吧。

再再再強調: 請勿燒地！請勿斬生樹！

要講柴火爐 / 焚火台 / 火箭爐 / 燒烤架之前，先要了解下燒柴嘅過程。

柴燃燒過程中會經過三個step

1. 高溫令到木柴中水份蒸發，變成水蒸氣

2. 經過蒸發後，木柴會變成木炭同黑煙

3. 木炭燃燒

喺step 2入面

木柴變木炭嘅過程中，釋放出嘅黑煙入面，含大量熱量同可燃氣體，佔木柴釋發出嘅能量40%，甚至更多！

而點樣可以唔浪費果40% 令佢氣體再次燃燒，依個就係玩柴火嘅關鍵，又稱「二次燃燒」

如何可以二次燃燒

答案係: 空氣。

利用外部冷空氣産生強烈對流，助燃內部高溫空氣，將果40%都燃燒埋。

助燃空氣供應量係二次燃燒嘅關鍵，太少空氣不足以支持燃燒，入氣太多又會拉低爐溫令到二次燃燒失敗。

所以二次燃燒就係一個爐出唔出色嘅關鍵。

講完一堆理論，就輪到講下啲爐有乜分別。

• 火箭爐
  
  
  

是一種改良自傳統爐灶嘅設計，主要結構係L型通氣管，外圍再做真空/隔熱層。當柴火燃燒後，熱力會集中喺爐底，形成二次燃燒。另外，通氣管中形成真空，新鮮空氣都會源源不絕咁從爐口自動吸入，形成煙囪效應，唔需要再撥火。

• 柴火爐
  
  
  

因為火箭爐的L形太大個，所以就有柴火爐嘅出現。細個，易收納同組裝係特色。

原理大致上同火箭爐一樣，不過因為少咗個L入加柴位，所以煮食時要加柴比較唔方便，另外因為無咗個L，所以柴灰比較易跌落地同灰太多就做唔到煙囪效應。

• 焚火台
  
  
  

前兩者屬爐式，焚火台屬平台式。

平台式好處係火力無咁集中，比較擴散，加上面積較大同承重力較好，可放上更大的柴枝，campfire一流。

• 燒烤架
  
  
  

因為燒烤架嘅設計係for 燒炭用。所以絕不適合燒柴，亦都無「二次燃燒」存在。玩下烤煮好了。

市面上仲有唔同嘅如煙囪、焗爐等。

大多都由以上幾類改進而成，唔一一介紹了。

揀好類別之後，就講選購前有咩需要留意嘅地方。

1. 物料

大多都用不鏽鋼制作，但近年鈦合金興起，雖然貴，但重量上大勝，所以睇個人能力了。

2. 組裝

大部分露營用嘅都需要現場重裝，如果過分複雜或配件太多，到露營時先發現重組唔到，就無謂了。

3. 離地高度

因爐底都相當有熱力，而草地長時間受熱下，會導致水份流失同損壞根部及種子等。

離地可以減少對環境嘅破壞，最好用上防火墊及喺草地上灑水，以防柴火溢出。

4. 有否配置燒烤網可能

再講多次，請勿直接用柴火燒食物！有需要可以用炭。

如果用炭，就要睇下可唔可以放燒烤網，同燒到幾多隻雞翼了。

同要留意返可唔可以放上cookset，始終都有機會用得著。

5. 可承重量

因始終有機會用黎煮食、煲水用，甚至想一條大樹幹放落去由佢燒，為免意外發生，選購時要留意埋可承重量，使用時唔好overload就好了。

玩爐時緊記離開天幕及營，盡量唔好著nylon or polyester 質地嘅衫褲，因為火屎好易辣穿一個個細窿。

事後嘅柴木灰係一啲好好嘅肥料，所以火種完全熄滅同冷卻後，可以放心灑返落泥土或草地上。

爐身基本上本老hike就唔會洗，最多洗一洗個燒烤架，反正唔影響使用同保養。

露營係應該Function > Fashion 唔好執著果D咩咩君，咩馬牌
一個唔好嘅柴爐，只係一個化寶盤。一個出色嘅柴爐，係可以令你迷上團火。

#知識分享

#户外攻略

FB: 老hike都去camp

MeWe: 老hike都去camp