知識分享 - LNT

户外活動中，成日都會聽到LNT - Leave No Trace 山野無痕，究竟LNT目的係咩，原意係咩呢？

LNT 概念源自美國，喺二戰後很多人到户外活動，有環保組織發現郊外使用率大增，對山林做成永久性破壞或影響。如Campfire後留低嘅痕跡。於是環保組織開始研究並推廣LNT，從心態以至行動，教育大眾尊重自然。

LNT並唔係指要做環保撚、道德撚，LNT原意係想令大自然環境可持續落去，令到我哋下一代都可以欣賞到我哋今代擁有嘅野。所以不論童軍、民安隊、山藝班等都致力推廣LNT嘅文化，咁世世代代都得以享受到大自然。

而LNT 主要由七大準則組成

1.事前充分的規劃與準備

2.在可承受地點行走、露營

3.適當處理垃圾及維護環境

4.保持環境原有風貌

5.減低用火對環境衝擊

6.尊重野生動植物

7.顧及其他使用者

• 事前充分的規劃與準備 

Planning的意思，一)要計劃出發路線，預計行幾耐、要準備幾多水、天氣如何、裝備要準備乜，減少意外出現，二)可以plan 吓餐單，要準備幾多食材，有幾多可以事前準備如: 去包裝紙、去皮、涮好、自備餐具、膠水樽等，減少垃圾來源就係最好嘅減廢嘅方法。

延伸閱讀: 事前規劃

• 在可承受地點行走、露營

避免難民營，因為同一地點太多人使用對環境會做成破壞，另外唔好私自開發營地或行走非現成山徑，個個都咁開，只會令到水土流失，嚴重起上黎，打風落雨時仲有可能山泥傾瀉，到時又少個地方了。

• 適當處理垃圾及維護環境

自己垃圾自己帶走。

帶走意思係帶離郊外，並唔係掉喺垃圾桶就完。

原因係郊外垃圾桶十年都無人清一次，試下將屋企嘅垃圾一個星期唔清，睇吓頂唔頂得順。另外仲會滋生蚊蟲，影響當地衛生，為人為己，請妥善處理自己垃圾。

延伸閱讀: 垃圾處理

• 保持環境原有風貌

盡可能唔破壞環境，不斬生樹、不採摘樹苗、不倒水泥、不改溪澗水道、不塗鴉，咁樣先可以keep到個營地次次一樣樣。

• 減低用火對環境衝擊

不燒地，就算要生火都要去返適當嘅地方如焚火台、燒烤爐等。

延伸閱讀：致燒地撚

• 尊重野生動植物

野生動物並唔係動物園入面嘅動物，行徑係你預測唔到，更加唔好扮可愛去親近佢哋，因為當佢哋習慣咗唔驚人類時，大家都會有危險。最緊要唔好餵食，當野生動物知道人類係有食物時，人類就會成攻擊目標，金山嘅馬騮、西灣嘅野豬、塔門嘅牛就係sample。保持距離、食物放好就夠了，可以不愛不要傷害。

• 顧及其他使用者

紮營時，諗下自己會唔會影響到其他人先。入夜後，請將音量收細，因為户外好寧靜，用正常音量傾計，隔30米嘅都可以聽得好清楚的。另外小心頭燈的燈光，你唔係cyclops，唔需要照人對眼架，照地下就夠。

延伸閱讀: 露營禮儀

Leave No Trace 唔係教條，唔係要強制執行，你可以唔認同，亦可以唔信，但唔好話人哋係道德撚，環保撚，只係人哋比你更加愛護大自然，更加想令下一代都可以享受到大自然。

#經驗分享
#户外攻略
FB: 老hike都去camp
MeWe: 老hike都去camp

Source: google