知識分享 - 背包的選擇

露營講到裝備，背包必定入三甲。

但作為新手上路，點樣揀個背包先啱自己呢？選擇背包時有乜需要注意嘅地方？

1. 容量
通常用L數代表，例如30L、45L等
數字越大，容量越高，有部分更有extend功能，會用45+5黎表示，即係個背包頂用到盡仲有5L空間。幾大容量就睇下自己裝備有幾多，通常要孭幾人份量等。
正常size 45L for solo
60-70L 兩個人野
80-100L 一家三口孭哂！
UL玩家就20L都夠solo

2. Size
背包最重要係舒適，所以啱自己身高最緊要，量度方法大約係以「第七節頸椎」（肩膀平行果舊骨）作為起點，一路延伸到「髖骨的最上緣」（雙手叉腰，感受到兩側骨頭突出處，兩點連線的中心）作為背長的終點，一定唔可以長過依兩舊骨。
通常啲袋都有分男女裝及L M S ，真係要上身試試先知啱唔啱。

3. 負重系統
由肩帶同腰帶組成，一個好嘅負重系統，可以將重量分散到腰同埋身體，令到肩膀受壓減少，行起上黎會更舒服，不過往往有負重系統嘅背包，重量上係比一般高，所以自己選擇。
腰帶除咗要確定位置喺髖骨上面，仲要試下鬆開肩帶，睇吓淨腰帶支唔支撐得起個袋。
以肩帶就要試埋心口扣舒唔舒服，因為一個背包，有機會要長時間用，唔舒服好大獲。
另外試果時，唔駛怕醜，叫職員俾啲重野你孭，咁就更準確。

4. 背墊
要睇埋背墊用咩質料。有啲用軟墊，孭得舒服啲，有啲用網布就透氣好啲，各有各好。

5. 布料耐用
一個好背包絕對可以用成廿年以上，所以耐用度高，就值回票價。

6. 口袋間隔
好緊要，間隔越好，裝啲小配件越方便。
仲要有水袋位，方便縱走時用。

最後，一個袋好唔好用，並唔係睇spec重唔重，夠唔夠大的。
最重要係配合手上equipment，如果我全身都係普通野，買個UL袋，會孭死我。
但如果我全部都係UL gear，又無必要買個負重系統強嘅袋。一切都係睇setting

同時，pack袋都係一門學問。
如果放得唔好，重量唔balance，有乜負重系統都死。同時無系統咁擺放，俾個100L你都可能唔夠用。
可以google 背包打包技巧，唔偷圖了。

#户外攻略
#老hike都去camp