我在香港中伏的日子(2)

繼上次 #我在香港中伏的日子，分享完香港電影嘅伏之後，今次本老hike分享喺香港山徑仲有咩伏。

• 
  衛奕信徑上的標距柱
  

眾所週知，標距柱係每500米一個。偏偏衛徑係約550米一個，如果事前唔清楚，好易計錯距離。

• 衛奕信徑2段尾上的指示牌
  

衛徑係一條橫跨港島、九龍、新界嘅線，所以完成第一二段後，係需要搭地鐵過海的。但當大家完成第二段後，會見到個指示牌指住第三段起點係喺你啱啱行出嚟嘅位置…. 而第二段起點係會指住太古站…. 個指示牌上下掉轉咗，投訴多次都尚未調整。

• 山徑上的絲帶
  

絲帶係舊時啲山隊為咗俾隊尾跟到或前人開路時留低記號。所以自古以來，都有跟絲帶方向習慣，但其實好危險。一黎絲帶係無寫路線難度，二黎有啲絲帶根本係夾硬黎。所以都係乖乖地用返傳統地圖好了。

• 
  崖上的救命繩
  

某啲山隊會出自好心，喺險位放置「救命繩」，留俾下手用。大家見到時，千祈唔好用！繩索放置經過一段時間嘅日曬雨淋後，就會老化變得脆弱！隨時都會斷開，到時真係要搵「救命繩」了。

• 電子地圖上的虛線

自從智能電話流行後，大多數人都會選用電話上嘅app規劃路線或定位，而部份app係會幫你劃最短路線去目的地，包括行虛線，而依啲虛線往往都係爆林丫，攀爬丫等線路。經驗唔夠時跟住地圖去到虛線位就….

• 地圖上的錯誤

就算用實體地圖，都有試過現場環境無咗地圖上顯示的路線，有可能係舊版或大自然埋沒咗，當遇到咁嘅情況，就要執生搵第二條路出嚟，切勿死跟導致迷路。

• YouTube上的風景

話說本老hike日前心血來潮，打咗句「香港馬爾代夫」上YouTube search，結果係有海就話係馬爾代夫。再講多次YouTube係屬於entertainment(娛樂)，絕非education(教育)，睇完YouTube之後中伏比比皆是，輕則無境無野睇，重則生命受到危險。

香港山徑舉世聞名，唔少外國人都專登過嚟欣賞，但偏偏我哋偉大嘅政府唔會去好好發展，甚至加腳落去破壞！導致危機四伏。所以出發前記住要做足功課，唔好人行你又行。

#户外攻略
#我在香港中伏的日子
FB: 老hike都去camp
MeWe: 老hike都去camp