我在香港中伏的日子

九十年代香港，正值港漫及港產片蓬勃期，當中不少情節、對白都會提及一啲户外地方，而本老hike往往會因為咁而走去該地方視察而中伏，今次就分享下中過咩伏

• 東龍島

電影「逃學威龍二」入面，葉德嫻因為周星星表現唔良好而要調佢去東龍島，經典對白「果度荒島黎」。
去過都知東龍島絕對唔係荒島，島上有自來水、士多、更有村民居住，假日仲人來人往，船飛經常超售甚至售罄。該描述唯一正確就係....無馬路。

• 火石洲

喺漫畫「古惑仔」入面，東星同洪興相約喺火石洲二百人互劈，而耀揚最終亦係死喺火石洲。亦因為咁，老hike想去拜祭耀揚....
Dls 畢亦樂呃9我，根本火石洲無可能擺到二百人，仲要講互劈，完全同漫畫描繪完全唔同，枉老hike仲好期待。

• 破邊洲

電影「殺人犯」入面，主角郭富城住喺破邊洲，有哂門牌又有大屋。
而事實破邊洲喺東壩對出一個小島，唔好話住人，上去都有難度，應該有唔小人中過伏。

• 狗牙山

電影「山狗」入面，主角們去狗牙山露營之後遭遇意外，當年老hike都搵咗好耐，邊度係狗牙山，會唔會指狗牙嶺，但老hike行哂咁多隻牙都唔似露營地點。
最後聽返導演講，原來非指狗牙嶺.......狗牙山只係虛構。

相信仲有好多電影、漫畫出現過嘅地方名但同事實不符，歡迎留言討論。

#户外攻略
#我在香港中伏的日子
FB: 老hike都去camp
MeWe: 老hike都去camp