經驗分享 - 小道具

露營中，除咗啲主要用具外，仲有啲出色嘅小用具，今日就分享下本老hike鍾意嘅玩具。

1. 噴樽

有噴霧、水柱、強力水柱，三種功能。

噴霧喺天熱時非常好用，噴身無咁熱，又可以節約用水。

水柱通常要黎洗手或收營前做營幕、睡墊、天幕保養時用。詳情可參閱 營具保養

強力水柱洗碗用，洗鞋用，強度為水柱的三倍，同時耗時量為水柱三倍，所以唔常用。

2. 曬魚網袋

當cookset 等清洗完後，就可以放入網袋晾乾水，又可以將食物放上網袋再掛高，避免野豬搶食。

3. 風繩

本老hike永遠都會袋多條長風繩，因為風繩作用太好，斷tent pole 可以用佢紮住頂一晚，

又可以將食物、水袋、垃圾等吊高，又可以紮個三角架，甚至可以拉繩晾衫，前提要學識繩結，詳情請search 一日一繩結

4. 汽球

汽球除咗係裝飾品外，喺户外，仲係強力嘅維修工具:

• o-ring老化

玩得耐就知，filter又好，噴樽又好，總之同水有關嘅O-ring 都成日出事，漏水、漏氣、跌咗、老化等，依個時候，汽球就代替個o-ring，做住水喉膠布先。

• 水喉套

有冇試過喺洗手間個洗手盤拎水覺得好麻煩，尤其是個盤唔夠深時。汽球就可以套入水龍頭，配合條膠喉，fill水無難度。

• 受傷包紮

汽球本身彈性好，如果意外受傷，可以用汽球配合紗巾等包紮傷口。

5. 求生刀

早廿幾年前，露營真係需要帶支maglite去，因為當年真係有II的。到依家，都唔駛偷渡，日日都有150人合法落黎，所以其實防身刀係冇乜用。
但本老hike都鍾意拎求生刀晌身邊，因為可以解決好多難題: 劈柴、紮作、整木碎、擦火石等等等等，加上touch wood有咩意外被困，有求生刀都可以救到命 (前題要識用)


小道具唔係必須，好唔好用就睇人，希望大家用得著。

#經驗分享
#户外攻略
FB: 老hike都去camp
MeWe: 老hike都去camp