經驗分享 - 保養營具

露營最令人沮喪唔係天氣差，係諗起成堆野要清潔果下痛苦。但適當嘅保養，先可以有效延長營具嘅壽命。

1. 營

收納前要先做清潔

因為唔係人人屋企都夠地方開營，所以建議每次離開前，都做好營嘅保養先。

先用淡水抹一抹個外帳。

將內帳反轉，倒出內帳後嘅沙石、樹枝、昆蟲等，再曬乾個營底。

Footprint 抹一抹，再曬乾。

Pole的接駁位都要用淡水抹乾淨。

但當撞正落雨就無計，唯有一個大垃圾袋入哂，返到屋企掛喺廁所，用花灑清潔，緊記要用凍水！再用牙刷刷返啲泥出黎。必要時可加少少中性洗衣粉刷，之後晾返乾佢。唔好過夜先處理，因為tent如果濕咗，24小時後就可能生霉，表面上仲會產生有污漬同異味，coating亦會受損。

另外存儲地方最好係：乾燥、涼爽，無陽光直曬，防潮箱係一好選擇。

2. 營釘、營繩

每次收時，洗一洗啲泥再抹乾就得。

3. 睡袋

每次用完都要拎出去曬吓吹吓風，咁先去到啲濕氣，無咁易發霉。

如果唔係成日用，就得閒拎出黎，因為成日喺收納袋度壓住，會影響袋內蓬鬆度，令保暖能力下降。

同時睡袋係需要洗的，因為訓覺時人體會排出汗水、油脂等，仲會痴咗喺睡袋度。

一般做法:用乾淨嘅濕毛巾，加少少中性洗衣液就得。

深層做法:用手洗！用中性洗衣液洗，之後唔好擰乾佢，由佢自然風乾，乾哂之後要拍返鬆佢，令入面嘅羽絨/纖維平均返。

唔好成日洗睡袋，因為每洗一次，保暖能力都會降低一次，通常都係換季時做。

4. 爐具

每次玩完之後，都要返去抹一抹，尤其係螺絲牙，因為如果入沙，啲沙會磨壞啲螺絲，仲要抹乾啲金屬位，以預防氧化。

另外久唔久都要check下啲爐頭有無漏油、o-ring有冇老化、用通針清清個噴咀等。

其實仲有好多野需要做保養，例如刀、cookset、甚至水袋都需要。

今次講住咁多先，有興趣可留言再講。

#户外攻略
#經驗分享

老hike都去camp