經驗分享 - 泳綑露營

泳綑(coasteering) ，就是指以游泳方式作綑邊活動，有需要時仲要渡海泳，屬高危活動。

泳綑露營(以下簡稱泳露)，帶上露營裝備，游出到去營地，甚至游出外島，其實同獨木舟出發差唔多，不過體力上、路線上就相當大分別。以下會分享下老hike經驗。

再戴多次頭盔
泳露係相當考驗體能、經驗、裝備，切勿亂試。

泳露季節好影響裝備，睡袋、保暖衫襪都佔相當的空間，另外還更需要準備wet suit，所以不建議冬季出發。

另外泳露裝備都好講究，因為長時間都會喺水中，所以必須要做足防水措施，以免裝備入水。同時都需要gear packing size夠細，除非你打算孭個70L dry bag出發。

裝備上本老hike認為最需要準備:

• Dry bag 防水袋

建議30L以上、有胸帶、有腰帶、有背pad、有外掛網袋。

雖然水有浮力，落到水時，都一樣會浮起，但始終落水前都需要行，所以負重同孭得舒唔舒服都好重要。

• Dry pack 防水袋(?)

就算有dry bag，都最好再將全部唔防水嘅gear 如衫褲、手機等再入dry pack，以防萬一bag入水。

• Fins 蛙鞋

蛙鞋，因為講緊係喺open water孭住袋游，當浪大起上嚟，個dry bag會將你個人扯走，用fins可以無咁吃力，再加上慳力啲，長途必備。

• Mask & Snorkel 浮潛鏡、呼吸管

可參考前編

• Ultra light equipment 輕量化裝備

因為你個防水袋空間相當有限，所以啲露營裝備都要偏向ul嘅方向，裝備最好可以multi-use。

• Filter 濾水器

因為泳綑係相當消耗身體上嘅水份，但為咗減輕燃料上嘅負重，所以建議用filter 過濾水飲用。

其他就係考驗自己露營經驗，去取捨拎咩裝備去。

當裝備準備好哂，就要考慮地點。

雖然泳露係可以自由選擇落水/上水地點，但有幾點都需要留意:

1. 水源

因為open water游完，無淡水沖身會好辛苦，同時上水後需要補充返大量水份，所以水源好重要。

建議學睇地圖搵溪或善用google。

2. 長度

幾長就睇自己體能、水流、浪等去決定

但要考慮離開時，玩完一日體力未recovery到嘅問題。so far 老hike 4km 覺得還好，應該6km會爆。

至於點計算長度，建議買地圖學比例呎。

3. 航線

因為可能需要渡海泳，如果係航道中間，係相當危險！所以要諗埋點兜路減低風險。

同時需要鮮色標誌俾船家留意到你。

建議先去google map睇航道再計劃路線。

4. 食材

泳露唔似得平時hea camp，再加上要裝垃圾帶走嘅關係，盡量考慮清楚食乜，夠唔夠熱量，放入袋會唔會影響袋裡面其他野等。

建議先喺家中準備，再入密實袋，去到煮熟。

5. 同伴

一個人喺open water游水係相當危險，同時一個人要拎哂全部野係比較辛苦，有同伴之下，每人拎啲，會舒服好多。

建議小組進行，太多人會顧唔到。

最後，欺山莫欺水，山有事仲可以打電話叫飛行服務隊，水有事，只有自己可以救到自己。open water同游泳池係兩個世界，仲要孭埋gear去露營更加唔輕鬆，進行前，請三思。

#户外攻略

#老hike都去camp