知識分享 - 睡袋
接上次 睡房的設定 ，睡袋係一項易學難精嘅項目。
睡袋好多時會按唔同天氣、人數、地方等唔同情況黎帶唔同的睡袋。
所以選購之前需要留意以下幾點:
1. 形狀
有分蛹形、信封形、人形
- 蛹形
一個可以鑽入去嘅睡袋，因為包圍住肩膊同頭部，所以保暖能力極佳，同時收納後size好。可惜因爲咁，喺睡袋內嘅空間非常之小，轉身都有難度，選購時仲要計埋個人嘅高度，又限制睡姿，適合唔反訓嘅你。
比較適合天氣凍嘅季節、地方使用。
- 信封形 (又稱方形)
一個可以打開嘅睡袋，打開後可以當被用，啱哂情侶兩個人去，仲可以同款拉鍊連埋一齊用，變張大被。
當唔打開時，同蛹形一樣可以鑽入去用，空間感同蛹形好得多，不過保暖能力同收納後嘅大細，就輸哂。
所以就比較適合無咁凍嘅地方用。
- 人形
一個本老hike認為似太空衣多過似睡袋嘅東東，設計目的係為方便行動，唔駛離開被窩之中。因為好貼身，所以保暖能力非常之好，收納後size不過不失，可惜市場未普及化。
2. 內含質料
質料係最直接反映一個睡袋暖唔暖，重唔重的，就好似家中嘅羽絨被、棉被等。
而户外用嘅通常都係: 人造纖維、羽絨 (應該無人買棉質咁癲掛....?)
- 人造纖維
超多種類，常見有: 中空纖維、聚酯纖維(人工羽毛)
- 中空纖維
當中又細分好多....
不過中空纖維有個特色，透氣孔特多，代表可以壓縮得好細舊，同時又易乾易洗，又保持到保暖能力，可惜，比較貴，一分錢一分貨。
- 聚酯纖維
對比中空纖維，就無得壓得好細，但都係易洗易乾，保暖能力都不如中空纖維，都係...一分錢 一分貨。
- 羽絨
羽絨睡袋，係用羽毛製成，常見有: 鵝毛、鴨毛。
羽毛本身含有數以萬計的小氣孔，可以吸收大量的空氣，避免體溫的流失，同時因爲多氣孔，壓縮性非常之高，所以收納後size相當之好。
揀羽絨睡袋唔止要考慮用咩毛，仲要揀埋係咩部份嘅毛。
羽毛有翼羽、髮羽與絨羽三類。其中翼羽和髮羽因為較硬，所以較常被用於支撐睡袋，真正能提供保暖的是絨羽部分。
所以選購羽絨睡袋時，仲要留意絨毛佔嘅比例，%越高，同體積上保暖能力越好，但都係一分錢 一分貨。
至於鵝毛定鴨毛，好似食燒味咁，個人喜好啦。
不過羽絨唔係無敵，因為羽絨清洗係好麻煩，一濕水就無法正常膨脹保暖，同時洗得多又會折損品質。又唔可以長期壓住，因為會破壞羽毛嘅彈性，所以要攤開黎放喺通風位黎掛放。
3. Size
睡袋啱身係好緊要，尤其是蛹形。太緊連轉身都有難度，但太鬆，就代表要用更多體熱去保暖。同理，過長同太短都一樣。所以買之前要了解自己或家人之身高，以防差得太多。
4. 保溫範圍
市面上睡袋一般都會列明保溫範圍(temperature rating)，即係描述個睡袋適合幾多度使用。當中分別用: extreme、limit、comfort 去表達
- Extreme
指可以喺睡袋中過夜的當地最低溫度，如果溫度低過指定溫度，就會有失溫的危險。
但唔好計到咁盡，通常建議多10°C，即係當地為0°C時，用extreme -10°C就會安全。
- Limit
臨界點，界乎於就開始感到凍嘅溫度，一般而言，到limit之前都會感到溫暖。
- Comfort
最理想溫度，但因為人人對溫度感受不一，所以一定有所差異。另外因爲香港潮濕，所以建議將comfort 加8-10°C。eg 當地10°C就要用0°C睡袋。
5. Fill Power 充絨量
Fill Power 係衡量羽絨厚度或蓬鬆程度既單位，同羽絨隔熱值粗略相關。
Fill Power 數字越大，羽絨所包含隔熱空氣越多，因此隔熱性能就越好。收納亦都會越細
簡單啲conclusion，先要揀自己想要嘅形狀，但食得咸魚要抵得渴，之後揀自己想要嘅溫度，再揀咩質地嘅睡袋，最後就會得一個點嘅size 睡袋。
溫度依啲好個人，仲要配合個營先知當日需要用咩睡袋。
睡眠好少可以一步到位，因為唔同季節會用唔同嘅溫度。如果真係撞正唔夠暖嘅，可以將全部衫著上身之後入睡袋，增加保暖。
本老hike 咩溫度都係一個睡袋打天下，因為老hike了解自己身體又係點，大家唔好學。
#户外攻略
留言
發佈留言