露營品牌史 – Trangia

香港，貴為國際大都會，不論飲食文化定居住環境都相當多國化。連露營文化都唔例外，上至hilleberg 下至淘寶都好容易買到，但云云咁多品牌入面，佢哋背後嘅歷史係點，品牌定位又係點？就由老Hike去分享下。

頭盔mode: 以下資料全部參考網上資料再加記憶，內容可能會同事實有少少出入。

• 創立
  

Trangia，屬於瑞典品牌，喺1925年由 John E. Jonsson同佢外父 Fritiof Svensson 喺瑞典一條小村  — Trångsviken 創立，John 喺一個農場大，但佢冇因為自己喺農場大而對農務系有興趣，相反佢自細就對設計同硏究充滿興趣。而佢外父Fritiof 就係一個出色嘅Sales，所以佢哋決定合作，試下攪生意睇下有冇機會發展。而Trangia個名係來自佢哋條村 - Trång村，後面ai兩個字係鋁嘅代號。

本來Trangia只係做鋁制廚具同家用器皿，但同時留意到一戰後嘅美國露營文化興起，加上喺1938瑞典已經開始工人每年有14日有薪假期制度，所以喺瑞典都引發起一股戶外風，從此Trangia開始生產戶外用品。

一開始Trangia生產一啲鋁制用品如杯、Messtin、水壺等相關用品，但一直都未有任何特別商機，去到1935年左右先生產出自己第一套Cookset – trangia 24，但銷量亦沒有突破發展。

直到John有一日參觀一間喺Östersund嘅運動用品度時。遇到名為Meta 50嘅Cookset，就俾Meta50嘅設計深深吸引住，但因為當時Meta 50係行固體燃料，所以John就講咗句名句「but it would be better off with a stove that was run with methylated spirits.」就係依句，改變咗整個Trangia。

• 發展

John認為cookset係應該易清潔、易使用，同時可以將全部野堆疊晒喺一個容器內，依幾點唔難處理，但作為Cookset心臟 – burner，因為John覺得爐應該要酒精輸出先好，但當時社會主流都係用電油、石蠟等做燃料為主，所以就需要長時間硏究。一開始時，因為Trangia係造鋁制用品起家，所以burner自然會選用返鋁黎製作。但經過多方面測試後，John發現原來用黃銅配合酒精嘅效果先係最好。同時喺burner底部印上Trangia字眼，係為咗底部不平而便燃料發揮。經過多年嘅改造之後，終於喺1951年成功開發出Trangia 25，輕身、可靠、壽命長同時唔需要保養、最重要係燃料平，結果當然大受歡迎。

穩定嘅輸出、設有通風口同提供風流嘅風擋、同一個可以調節火力嘅simmer ring，令到Trangia 25為冠上” Storm Cooker”依個稱號。而no.25因為係設計俾3-4人家庭用，所以見到no.25成功，Trangia亦喺1957年推出1-2人版嘅no.27，成功吸引到瑞典軍方注意，喺1964-1976為瑞典陸軍生產burner。

之後嘅時間，Trangia都不停為佢哋嘅用具改良，例如

1988年為咗解決攜帶燃料問題而開發燃料樽。
1993以Duossal代替不鏽鋼，2007年又以Ultralight Hardanodized aluminum (超輕陽極化鋁)再次取代。
1995仲同同係瑞典公司嘅primus合作，為trangia製造gas爐頭等

其中多項設計獲得COLA Awards，其中Duossal pan、燃料樽更獲得Product of the Year Awards 年度大獎。

• 定位

直到今日，Trangia都依然喺當初嘅trang村以每6分鐘一個爐嘅驚人速度下生產。亦因為多年嘅努力，trangia已經成為酒精爐嘅代表之一。Trangia亦喺可持續發展方面都相當出色，因為酒精比天然氣嘅碳排放量足足少6倍咁多。加上Trangia材料幾乎都係用鋁制成，所以收回係非常之容易，

而當中最signature嘅Trangia25/27唔單止價錢平，仲因為物料上嘅進步令佢越來越輕同時又越來越堅固，加上酒精爐生命週期都超長嘅關係，一爐傳三代真係唔係夢想。

Ps. 去沖繩玩，記住搵老hike租車

#露營品牌史
#户外攻略
FB: 老hike都去camp