露營品牌史 - GSI Outdoors

香港，貴為國際大都會，不論飲食文化定居住環境都相當多國化。連露營文化都唔例外，上至hilleberg 下至淘寶都好容易買到，但云云咁多品牌入面，佢哋背後嘅歷史係點，品牌定位又係點？就由老Hike去分享下。

頭盔mode: 以下資料全部參考網上資料再加記憶，內容可能會同事實有少少出入。

• 創立

GSI Outdoors係由加拿大兄弟 – Ian Scott、Don Scott喺1985年嘅美國San Diego(聖地亞哥)創立。本來Scott兄弟係做建築公司工作，包括出口、專案等，但因為出口市場變得越來越差，所以兩兄弟把心一橫自己出去創業，當時俾佢哋留意到有一間Mexico (墨西哥)廚具公司想搵美國經銷商，所以就由廚具方向入手，而喺佢哋公司嘅秘書Kathy聽完佢哋計劃都參與埋一份，就正式開始GSI嘅業務。

喺成立初時，GSI並唔止發展戶外Cookset路線，又有出過充氣筏，又有出過bouncing shoes(跳跳鞋)，但大多數都唔成功，反而賣blue enamel tableware(藍色琺瑯餐具)賣到出晒名，亦因為Scott兄弟細個時都經常去戶外，所以就展開戶外Cookset嘅生意。

• 發展

GSI嘅發展相當順利，亦因為Scott兄弟做開生意，所以喺批發、分銷等業務上非常成功，例如喺1995年因為睇中Spokane(斯波坎)嘅低稅收制度同埋近加拿大，所以就將公司搬過去。又例如佢哋好早期已經有搵中國、墨西哥等當地工廠代工生產並去到歐洲、日本銷售等。

雖然佢哋做生意叻，但唔代表佢哋冇用心去Design。除咗出名嘅琺瑯餐具系列外，GSI仲發明咗拆除式手柄，菱角形切口嘅設計比傳統實心手柄更輕更容易收納，成功喺眾多Cookset中突圍而出。

喺2001年仲成功以HAE(陽極氧化處理)成功獲得Backpacker編輯大獎。
另外GSI仲有一個世界聞名嘅產品 - 戶外濃縮咖啡機*，令到露營變得更有生活態度，更Chill。

*咖啡機其實唔係GSI發明，只有一間意大利工廠搵GSI獨家發售。

GSI亦都因應時代嘅進步而不停推出新系列，例如可以燒嘅Silicone摺煲、咖啡熱茶專用嘅filter等。

同時GSI亦都明白戶外用具係極具消耗性，為咗增加產品耐用度，就採用咗有Radiance技術嘅Teflon，三層Coating令到Cookset有強勁嘅耐刮度、耐磨度、同獨特嘅不黏性能。Hard Anodized(硬質陽極氧化)技術令到外面堅硬同受熱平衡。所以GSI戶外Cookset深受露營界喜愛。

同其他戶外品牌一樣，GSI喺環保永續方面都有落苦功，喺生產過程中盡可能使用可回收物料同埋減少產品包裝等。

• 定位

GSI 依家95%業務都係同戶外cookset有關，上至炒鑊下至調味樽都有，經典嘅藍色更成為佢哋嘅Signature。GSI價錢唔貴，亦非常耐用。同時GSI Product都享有Lifetime warranty，只要Product係正常使用下嘅自然損壞，GSI都會提供免費維修*，就算唔合乎條款，GSI都會以比較平嘅價錢提供零件，務求唔會令件舊品變垃圾。

*只限於授權經銷商同GSIoutdoors.com出售嘅Product
**GSI有最終決定權

Ps. 去沖繩玩，記住搵老hike租車

#露營品牌史
#户外攻略
FB: 老hike都去camp