露營品牌史 – Coleman

香港，貴為國際大都會，不論飲食文化定居住環境都相當多國化。連露營文化都唔例外，上至hilleberg 下至淘寶都好容易買到，但云云咁多品牌入面，佢哋背後嘅歷史係點，品牌定位又係點？就由老Hike去分享下。

頭盔mode: 以下資料全部參考網上資料再加記憶，內容可能會同事實有少少出入。

Coleman
屬於美國品牌，由創立人William Coffin Coleman於1901年創立。

初時Coleman係以銷售掛式汽油燈為主，但因為果時嘅汽油燈好易有故障嘅問題，所以Coleman由銷售轉為租賃，賣點係壞咗都唔駛賠償，結果大受歡迎，生意亦越做越好。到1903年，索性自家硏發掛燈，成功引起美國軍方注意，喺一戰期間，Coleman嘅掛燈被美軍稱為重要嘅戰爭物資之一。

第一次世界大戰後，汽車露營文化興起，Coleman睇準機會，喺1923年推出可以用汽油嘅雙頭爐，結果大受歡迎，仲被稱為「戶外廚房」。之後去到1932年，Coleman開發出戶外暖爐，當然又再一次成功。

去到1942年二戰時期，美國軍方要求Coleman硏發Pocket Stove (口袋爐)，但要求非常嚴格，首先必須要輕，Size唔可以大過1quart嘅樽(大約1L Size)，可以用任何燃料，同要喺-51°C至+52°C下都可以正常使用。以當時世界技術黎講，基本上不太可能，但Coleman用咗兩個月左右時間，就成功開發咗名為「GI Pocket Stove」(Model 520)，其後更加有推出Model 536同538嘅民用版，但因為硏發費用係由美國軍方負責，所以佢哋有最終生產決定權，最後就轉交咗由SMP生產，Coleman就冇再出了。

戰後Coleman嘅掛燈同爐頭一直都屬於tier 1地位，但Coleman冇因為咁停止腳步。仲喺1954年硏發出鋼制冷卻器，3年後，更歷史性首次將模製塑膠投入實際應用，徹底改變雪櫃形態，令Coleman變成美國家庭人人都識嘅品牌。

其後1965年，Coleman開始生產自家嘅帳篷、睡袋等露營用品。Coleman更睇中日本市場，先喺1976年喺日本設立Coleman Japan，並1989年將掛燈引入，一年後再將雙頭爐引入，1992年更喺日本宣傳美式Car Camp文化，次年更為日本市場開發日本原創產品。

Coleman產品特色係「長壽」，目標係將每一件產品做到環保同長壽命。就算遇上損毀問題，都可以送去Coleman維修中心進行維修或翻新。如果有興趣DIY，Coleman更會提供硏討會介紹維修方式同提供支援。

Coleman 喺Camper眼中係屬於新手至老手都愛好嘅品牌，新手鍾意佢易入手，老手鍾意玩戰時古董。不過Coleman始終定位係美式家庭Car Camp風，所以產品都偏向大舊同重身，比較適合有車嘅家庭。 

Ps. 去沖繩玩，記住搵老hike租車

#露營品牌史
#户外攻略
FB: 老hike都去camp