露營品牌史 – MSR

香港，貴為國際大都會，不論飲食文化、居住環境都相當多國化。連露營文化都唔例外，上至hilleberg 下至淘寶都好容易買到，但云云咁多品牌入面，佢哋背後嘅歷史係點，品牌定位又係點？就由老Hike去分享下。

頭盔mode: 以下資料全部參考網上資料再加記憶，內容可能會同事實有少少出入。

• 創立

MSR，全名Mountain Safety Research。係由一個叫Larry Penberthy嘅登山家於1969年創立。創辦人Larry 除咗係登山家外，仲係一個出色嘅工程師、開發家，喺二戰時，曾經幫軍方開發軍用瞄準器上面塊玻璃，又擁有多項專利。同時Larry對戶外產品嘅安全性同可靠性要求極高，所以會對唔同嘅戶外用品進行測試，並將測試結果以MSR之名不定期發佈。結果非常受戶外界歡迎，引起一間喺Seattle嘅committee of the mountaineers邀請一齊做裝備安全測試。

之後嘅18個月，Larry對爐頭燃料、繩索、岩釘、冰斧等多方面裝備做測試。點知越測試就發現越多問題，最大問題係Larry發覺佢哋已經承擔唔起個計劃費用，但又唔想中止計劃，所以就喺1969年以Bozanza Peak嘅形狀做Logo正式創立MSR（Bozanza Peak係Larry後生成日去嘅地方）。並將硏究結果、戶外知識等制成裝備期刊俾大家訂閱，創刊號內除咗有建造雪屋嘅詳細教學外，仲附送如冰斧、雪橇、攀岩繩索、保暖手套、鉤環、織帶、雪鋸等戶外裝備，吸引到相當多訂閱。除咗發行裝備期刊外，MSR同時自行開發同售賣安全嘅戶外裝備，並將營利轉化作裝備硏發同教育登山者安全知識嘅經費。

• 開發

MSR最早期嘅產品係冰斧，但要數令MSR出名嘅產品，就一定係Model 9。

Larry喺硏究急性高山反應(AMS)時，發現原來大家缺乏嘅唔係鹽而係水。喺硏究過程中，發現飲水不足會導致血液變酸性，pH值亦都會因為咁失衡出現AMS。但喺雪山上，登山者唯一可以飲用到嘅水就係雪，為咗加速將雪融化成水，所以Larry就著手硏究可以喺最極端嘅寒冷和大風嘅高山上依然可以提供高熱量輸出嘅爐，同要絕對可靠，畢竟一個失敗就隨時一條人命。喺硏發過程中，Larry發現一件好重要嘅事，原來爐接收燃料嘅方式對高山條件下嘅表現極大影響，而當時戶外界全部都係一體式爐，所以1973年Larry就開發咗名為model 9嘅分體式爐，結果當然係大成功。除咗成功開發Model 9外，仲喺同年發佈AMS登山手冊，去分享如何可以有效預防AMS情況，硏究結果亦影響後世好深。

Model 9嘅成功後，引起MSR開發更多戶外用品，之後陸續發售帳篷、背囊、頭燈、雪爪、頭盔等等，雖然唔係每一項都得到回響，但都已經受人關注。順帶一提，全部硏究都係Larry親力親為，最有趣係有次Larry為咗測試新營嘅抗風性，竟然將隻營放喺卡車上面，再以60km/h速度做測試。結果當然令人滿意。

• 被收購

MSR嘅成功，引到當時已經雄霸咗北美嘅Recreational Equipment, Inc.（簡稱REI）注意，並於1981對MSR進行收購，當時Larry都已經70歲，亦已醉心硏究核廢料。所以REI成功收購。

被收購後嘅MSR第一時間被REI廢除舊有Bozanza Peak嘅Icon，改換上Matterhorn Peak做新Icon，但產品開發團隊冇因為咁停低腳步，之後幾年就出現大家所熟識嘅靜音油爐whisperlite、dragonfly等，又有開發water filter、kitchen set等。

去到2000年，REI 都認為自己品牌已經夠成熟，就開始將旗下品牌包裝再出售，所以將Edgeworks、Moss、Walrus、Armadillo等品牌都合併到MSR。MSR Logo亦再次改圖，由1992年嘅紅色山峰，再精琢而成，其紅色象徵住係山上救援嘅意思，其他產品亦由1992年開始以紅色為主。

而REI今次嘅合併，造就另一個傳奇人物 – Terry Breaux

• 傳奇

Terry一係名老派帳篷設計師，從細個開始就會自己修補、改造、製造釣魚、露營用品。大學時入讀建築系，亦被大學灌輸要以保護自然資源方式去建造安全、耐用嘅用品。

大學畢業之後，Terry就入咗帳篷品牌Moss tent做佢第一份工，喺Moss度佢學識咗老派帳篷做法，例如手畫紙樣、縫製原型等。其後Moss tent俾REI收購，亦將Moss tent納入MSR內。但Terry並無因為咁加入MSR，反而係走去踩單車環遊世界。

穿過威爾斯、英國、冰島、瑞典、挪威、西班牙和摩洛哥。去到土耳其，遇到一個同樣單車環世界中嘅瑞典裔美國人，之後佢哋一齊繼續穿過巴基斯坦、印度、尼泊爾、西藏、中國、蒙古，最後到北京結束。

旅程結束後，突然靈光一閃嘅Terry就加入喺2001年已被Cascade Designs成功收購嘅MSR，擔任帳篷開發，所以MSR嘅帳篷當中唔難搵到Moss Tent嘅理念 – 比較勻稱、形狀簡單、精確細節。

雖然Larry已經離開同經過多次合併、收購，但MSR開發部冇因為咁對產品嘅測試放鬆，反而變得越來越緊，由用卡車測驗，進化到用150psi水壓做測試，當然唔少得用冷箱同焗受爐等做溫差測試及實地測試。

直到依家，MSR都一直致力開發雪山用品，為各位登山者提供最安全、最穩定嘅用具。除此穩定外，MSR仲有為其下產品提供維修服務，如有任何用品需要檢查或維修，都可以送到去維修中心進行維修，如果喺保養期內，更可以免費維修、更換服務（以前係終身保養，依家改咗3年期）為各用家提供最好嘅back up。

Ps. 去沖繩玩，記住搵老hike租車

#露營品牌史
#户外攻略
FB: 老hike都去camp