日本露營文化分享 – Camp fire

日本係非常鍾意玩Camp fire嘅地方，鍾意嘅程度差唔多可以同Camping 劃上等號，冇Camp fire就等於冇露過營，但同時佢哋又會好遵守LNT法則，所以日本Camp fire文化係好值得分享。

• 柴
  

玩Camp fire最少都要有柴，柴日文叫薪，通常會分細い薪（幼柴）同太い薪（粗柴）

細い薪（幼柴）
即係引火。我哋香港用木碎、松果等做引火，日本都一樣會用佢哋做細い薪，但要留意每個地方規劃唔一樣，所以唔好亂執。同時運動用品店都有一包包已經Pack好嘅細い薪，方便新手入門。

太い薪（粗柴）
太い薪喺一般運動用品鋪都會買到，大部份營地亦有現場出售，通常由兩種樹林黎做：

1. 広葉樹
   比較難起火，但比較耐燒，煙亦比較少。
   
   
2. 針葉樹
   同広葉樹相反，好易起火但亦比較快燒完

買嘅柴好就好在已經做好風乾等程序，除咗可以有效咁減少燒柴時因水份而產生嘅濃煙之外，亦唔擔心柴面有污糟物，令Camp fire變成可以直接BBQ，增加風味。

另外，雖然日本無明文規定唔可以用野外柴枝，不過都好少見有人執柴，一黎有部份柴係有毒如夾竹桃枝，二黎濃煙會影響其他人。

除咗用幼柴做引火外，日本仲好鍾意用火口黎做著火劑。

• 火口

大概係指比幼柴更易燃燒但亦會好快就燃燒完嘅物品，eg 炭精、麻嘅纖維、棉等等。

除此之外，如果日本要喺草地用焚火台，係必須配上防火墊，以防草面受熱力或火種影響

• 防火墊
  

日文叫焚き火台シート，通常會以玻璃纖維配上Double silicon處理做成防火防水效果，會以能承受嘅溫度同防火墊大小去區分，一般而言柴溫度大概係500 – 700 ˚C左右，所以承受溫度係依個範圍內就足夠。不過要注意，一般防火墊會有兩個耐火度：作業溫度，瞬間使用溫度。

1. 作業溫度：係指一般正常使用時可承受嘅溫度，作業溫度係同整體重量成正比。
   
   
2. 瞬間使用溫度：係指突然有意外例如焚火台解體時，防火墊可以短時間承受嘅上限溫度。由於實際可以承受時間無從估計，所以作參考好了。

另外，日本大部份營地都會要求大家22:00後就寢，所以21:00要開始執野。如果有未完全燃燒嘅柴或炭，都要拎去炭棄置場（炭捨て場）處理。但去野營或場內冇提供嘅話，就要自己準備火消し壺。

• 火消し壺
  

中文應該譯做滅火壺...? 係一個專門處理Campfire / BBQ後嘅柴或炭嘅容器。一般有兩隻用法

1. 水消火
   首將桶注水，之後將柴或炭放落去降溫。好處係即時見效，唔需要等，同時冇咁危險，不過柴或炭就好難回收再做，除非再次做風乾處理。
   
   
2. 酸欠消火
   將柴或炭直接放落桶內然後封口，等桶內空氣完全歸零後，柴或炭就會自然熄滅。好處係柴或炭可以即時再用，但因為要空氣完全燃燒需要較長時間，同時等待期間桶身都相當高溫，會比較危險。另外因為空氣完全燃燒過後會係形成真空現象，所以再次打開時相當費力。

記住日本係唔容許直接淋水滅火，因為會令水變得高溫從而灼傷草地。同埋係唔容許燒過夜。

一塊靚嘅草地，絕要靠大家保護先可以得以保存。雖然好似要拎多好多野，但為咗保護環境，拎多一個桶一張墊，拎少一串燈一支旗都已經喺返度。

Ps. 去沖繩玩，記住搵老hike租車

#經驗分享
#日本露營文化分享
#户外攻略
#老hike都去camp