經驗分享 – 海外露營

香港地少人多，本來營地已經供不應求，再加上經過長達兩年嘅封關，吸引咗大量忽然HIKE加入，就連X位都迫爆。雖然依家已經解封，但嘈音、光害等問題依然無解決。再加上野豬問題日益嚴重，既然係咁，有冇諗過試下海外露營？去海外露營有咩規矩？有啲咩裝備係唔可以拎出去呢？

以香港最近地點嚟講，可以選擇嘅地區有：中國、台灣、日本

• 中國

  

  Source:Google

因為近年唔單止香港興起露營潮，連中國大陸都興起露營文化，中央政府直頭下令推行「綠地共享」要求各城市開放城市公園俾市民野餐、露營、唱歌、跳舞等。淨講最近香港嘅深圳，就已經開放咗42個公園俾市民綠地共享。

不過要用依42個公園露營    就要留意佢哋嘅規矩

• 佔地唔可以大於5平方米
• 高度唔可以高過1.5米
• 唔可以落釘
• 營唔可以完全封閉，要喺外面望到入營
• 營內唔可以吸煙、煮食、大聲喧嘩

亦有私人收費場同Glamping場可選擇，不過價錢就….
另外唔建議租露營車去玩X-Camp，因為野生動物多，距離市區又遠，有事未必可以第一時間救援，除非好熟該區地形。

就以上條件上睇，返深圳露營係0吸引力，唯一好處係唔駛坐飛機，時間彈性。

如果真係想試下去大陸露營，要留意壓縮氣體係唔可以過關，即係高山氣、卡式氣都要入境後買。白電油、酒精等屬於易燃物品，同樣唔可以帶過關。另外全部刀、斧、鋸、鎚、營釘等一論唔可以過關。

• 台灣

  

  Source:秘境野遊FB

台灣早十幾年前已經興起露營文化，加上台灣地大山多，由台北到台東，甚至金門、澎湖等都有營地提供，營地配套仲好好，車到、有冷熱水浴室、甚至有電供應！不過大部份營地都需要事前申請，亦可能需收取費用。每個營地要守嘅規矩都唔同，如有部份一定要喺木棧臺上起營，有部份唔俾起火，有部份夜晚十點後仲會燈光管制，所以如果去台灣露營，一定要做足功課。

當然，台灣都有大量私人收費場同Glamping場可選擇，甚至可以租架露營車去到邊露到邊，喺依方面，台灣就冇咁大限制，但一定要留意天氣，萬一出現河水氾濫、山洪暴發、山泥傾瀉等就危險。

另外，台灣雖然營地發展成熟，但除咗私人收費場之外，大部份營地都係需要自己準備營具，未做到兩手揈揈去露營，所以如果準備坐飛機去台灣露營，記住要留意:

• 全部高山氣、卡式氣、白電油、酒精等燃料都唔可以帶上機
• 刀、斧、鋸、鎚、營釘、Pole、營骨、火石等一論要寄倉
• 火機可以隨身帶過去，但回程唔可以帶返香港
• 全部鋰電用品嘅如Power Bank、營燈、風扇、電Pump等都「唔可以」寄倉
• AA、AAA等鹼性電芯用品都需要拆電芯先可以寄倉。
• 蚊怕水可以帶，但最好換成扭蓋，因為用噴咀的話，可能會因為氣壓令到蚊怕水由噴咀流出黎。

總括上台灣露營感覺唔錯，配套好，選擇多，文化都相近，不過申請比較麻煩，有興趣可以試試。

• 日本

  

  Source:PRtimes

四個地方（香港、大陸、台灣、日本）中，日本嘅露營文化應該係發展得最好，日本人由細到大都好鍾意露營，小、中學都會大力推動露營文化，暑假更加係露營高峰季節。

全日本有多達3,000個營地，當中大部份都係免費，不過收費場會提供到更好配套，如：自來水、洗手間、浴室、車位、甚至電力。而收費亦都相當合理，一般都係¥400 ~ ¥3,000/晚。同時大部份營地都有出售BBQ Set、飲品、柴等，當然唔少得營具租用，所以絕對做到兩手揈揈去露營。

如果唔想租用場地裝備或鍾意用返自己gear的話，裝備方面同台灣一樣都要注意返：

• 全部高山氣、卡式氣、白電油、酒精等燃料都唔可以帶上機
• 刀、斧、鋸、鎚、營釘、Pole、營骨、火石等一論要寄倉
• 火機可以隨身帶過去，但回程唔可以帶返香港
• 全部鋰電用品嘅如Power Bank、營燈、風扇、電Pump等都「唔可以」寄倉
• AA、AAA等鹼性電芯用品都需要拆電芯先可以寄倉。
• 蚊怕水可以帶，但最好換成扭蓋，因為用噴咀的話，可能會因為氣壓令到蚊怕水由噴咀流出黎。

除了一般營地外，Glamping、Car Camp都發展得好好，另外都有X-Camp愛好者都非常之多，亦有日本単独野営協会幫手教育、管理。

日本雖然配套好，但營地規矩亦好多，常見嘅有

• 預約制

絕大部份營地都係需要預約，如果做開外國人嘅營地都還好，通常都會有提供網上（ネット）預約，但如果係比較本地嘅，就可能得電話、fax預約。

• 需按時離場

因為預約制關係，所以需要準時出現同埋準時離開，日本人對時間觀念都幾重，所以要留意時間。

• 垃圾管理

通常會有三個Option

1. 要求將垃圾自己帶走
2. 要求將垃圾分類
3. 俾錢由管理員代為處理

日本垃圾分類對旅客黎講可能係一大挑戰，如果分錯類，係會被要求重做，所以都係乖乖俾錢吧

• 聲音管制

禁止使用發電機、卡拉OK等發出嘈音嘅工具。另外因為22:00後係就寢時間，所以22:00後就要將音量收細，如果有其他人投訴的話，可能會即時請你離開（真係靜到連拉開營門都覺得影響到人）

• 光源管制

為咗唔影響其他人休息同觀星，所以大部份營地都係22:00之後熄燈，同時要求大家都熄燈，去洗手間都唔好意思開頭燈。

• 嚴禁燒地

雖然日本人都好鍾意玩營火，但佢哋亦討厭人燒地（日文叫直火），如果被發現，必定報警處理。另外，起火後如果用水淋熄的話，水嘅溫度都會傷到草地，所以燃燒過後嘅柴/&炭都要去炭棄置場（炭捨て場）處理。

最後日本是非常注重LNT文化，無論係Glamping、Car Camp、X-Camp都好，都會嚴守7大法則。

日本露營係最靜最舒服，不過唔適合一啲覺得去到戶外就可以大聲高歌、劈酒天光嘅E人。同埋夜訓開嘅香港人可能都未必會慣。

總括嚟講，海外露營價錢平（計返機票酒店錢，隨時仲平過香港一晚Staycation）、環境靚、配套好，但最緊要係要裝備上識取捨，否則一見到成車gear就已經冇晒癮。

Ps. 去沖繩玩，記住搵老hike租車

#經驗分享
#户外攻略
#老hike都去camp