知識分享 - 柴火爐

經驗分享 - 天災應對 

話說本老hike早前喺沖繩經歷咗一個非常恐怖嘅颱風 - 颱風卡特，日本稱為台風6号。風力之勁係可以吹得反一架車，連老hike住緊嘅一戶建都感受到層樓係震緊，而最嚴重係...斷咗電力、網絡足足48個鐘，而依48個鐘內，多年戶外知識同裝備終於大派用場。所以今次分享有咩技巧係喺災難時用得著。 

 

• 準備 
  

現今世代，已經好多科技可以做好精確嘅預告，當中民用嘅windy預測已經好好，當已知未來會有自然災難發生前，就要準備好長期作戰時準備，需要準備包括有： 
  因斷電嘅影響 

斷電後對每家人影響都唔同，最大影響不外乎: 網絡、燈、熱水爐、雪櫃、風扇 / 冷氣、煮食爐頭 / 電飯煲 / 微波爐、洗衣機、手機及娛樂用品等，針對災難時所需的用品做好適當的準備。將全部尿袋叉好電；太陽能板、柴油發電機等要拎出黎；油燈、氣爐等燃料買齊，以防斷電。

因斷水嘅影響 

常言道，人體內有70%係水份，而人類每日需要吸收2-3L水先足夠，一個正常人，唔食野仲可以頂到2-3個星期，但唔飲水的話10-14日已經係極限，所以補充水份係必須嘅。水唔單止係為咗飲用，仲要煮飯、沖廁、沖涼、洗碗等用途。一但斷水的話，避難點一定會發臭。所以要為斷水做好準備。水通常分開生水同熟水，生水即係未經處理嘅水，一般用嚟沖廁、沖涼、洗碗用，熟水就係經過處理嘅水，一般用嚟煮用及飲用。考慮到可能唔會斷水但單方面斷電嘅問題，所以亦要準備好filter。 
 
因斷糧嘅影響 
食物重要性應該唔駛多解釋，除咗補充體力外，仲可以令心情舒服一啲。但要考慮到因斷電嘅問題而出現煮食用具及儲放嘅影響。糧食應偏向罐頭、麵包等為佳，如果水源充足，亦可以考慮即食麵、杯麵等容易儲放嘅糧食，另外，雞蛋、白米都屬於容易儲放嘅糧食，有能力處理的話都可以準備多啲。 
 
因環境嘅影響 
當處身於地區有機會發生河水氾濫、山泥傾潟、水浸或倒塌的時候，就需要緊急撤到其他避難點，考慮到依個情況隨時會發生，所以要準備個應急袋，袋內需要物資最少都要有: 電筒、雨褸、飲用水、乾糧、保溫毯、急救包及一套乾既內衣褲等，另外袋唔好太大，會影響活動或進入窄道，同時要準備哨子跟身，以防萬一。 

•  保冷箱 

萬一斷電，雪櫃一定係最麻煩，同時亦好重要，一嚟要儲備食物，二嚟如果處理得唔好，入面既食物會total lost。不過對一眾camper嚟講，冇乜難度，因為雪櫃冇電時，就係一個保冷箱，準備好保冷劑、冰，減少開門次數，同盡可能先清雪櫃內既食品，兩三日係絕對冇問題。 

•  電源 

斷電仲有一個好大問題，就係手機電量，避難時唔同露營，一嚟唔知會被困幾多日，二嚟係極度需要手機同外界連絡，上網更新情況等。所以手機電量亦都非常重要。最佳方式當然係需要用先開機，但其實唔係咁好，因為會收唔到外界最新情報，連緊急警報都接收唔到，幸好作為camper，相信會唔止一個尿袋，甚至有太陽能板，更誇張係可能有柴油發電機，所以各camper都輕鬆解決依個問題。

•  爐具 

好多人屋企都係用電磁爐，但當斷電後，就連煲個熱水都會做唔到，而camper嘅基本工具，正正就係爐具，所以就算屋企係用電磁爐都唔使驚，不過要小心屋內用明火嘅風險，同時要準備充足嘅燃料。 

•  照明 

斷電後一入夜就會漆黑一遍，一般家庭可能只有普通電筒甚至只有手機可以照明用，但露營燈係camper必備的，所以根本唔會擔心照明問題，如果流明夠的話，甚至可以放上本身家中既燈罩上用，同平時冇乜分別。不過如果用充電式就要注意電量，而用入電芯或用燃料嘅就留意存貨量夠唔夠。 

•  繩結 

因為災害來襲時，好多時都要綁好放晌露台或門外嘅雜物如單車、花盤等，依個時候，繩結就幫到手，繩結一嚟比索帶等工具彈性更高，二嚟繩結安全性更大，所以識繩結嘅camper喺依D時候，就可以發揮作用。 

•  沖涼 

7. 對camper嚟講，一日半日係家常便飯，但如果3日以上 / 對家人黎講，就唔係咁了。而有水袋嘅大家，就可以輕鬆解決依方面問題，如果水袋係屬於能受熱嘅hdpe就更好，可以溝入熱水沖返個暖水涼。 
    

總結上，48小時停電對老hike嚟講，只係喺屋企露咗三日兩夜營，一切生活如常，但見到好多人雪櫃內食物total lost，夜晚只可以煮杯麵，沖凍水涼感親等，就慶幸自己嘅露營知識，幫家人一同渡過災難。 

#經驗分享
#户外攻略
#老hike都去camp