經驗分享 - 毛孩都去camp

毛孩，根據wiki解釋即係「寵物」，喺香港地，地少人多教育回塘嘅地方，有唔少人都放棄生小朋友，取而代之係養寵物，更有人視寵物為親生仔女，所以稱為毛孩。

而好多毛孩本身都係來自大自然，作為父母嘅大家，去camp依類活動當然會想帶埋佢去，但帶毛孩去camp都相當唔易，今日就分享吓有咩地方要注意
PS. 因現時毛孩種類繁多，所以都分享會以狗狗為主。

1. 寄生蟲
帶毛孩去戶外，最大問題就係遇到寄生蟲，尤其是幼年時期，一般寄生蟲會透過環境或進食甚至係蚊叮而感染，同時部份寄生蟲仲會傳染埋俾人類，所以不論去唔去camp都好，都需要幫毛孩做足杜蟲工作，以下會簡介一下戶外常感染到既寄生蟲。

• 牛蜱

屬寄生物，晌香港既春、夏季非常常見，靠吸食血液為生，一般係會出現晌公園、草叢既長草上面，等宿主如：毛孩、人類等哺乳類動物經過時，就會跳上去寄生，同時將疾病(常見的有牛蜱熱)傳播，當食飽就會自己離開，但一般都需要寄生4-8日，所以係好大機會帶埋返屋企甚至產卵，危害埋家人。

預防方法：
一般可以於市面上搵到預防牛蜱頸帶，另外返到屋企前都用除牛蜱既粉、沖涼液 or 噴霧等清潔一下毛孩身體尤其係耳仔、下巴、腳掌、手腳、和腹股溝以及腹部，以防萬一。

• 心絲蟲

屬寄生圓線蟲，一般透過蚊傳染，當宿主身上帶有心絲蟲同時又俾蚊叮的話，蚊係會將心絲蟲帶到去另一個宿主身上，而宿主主要係狗為主，不過都會宿生晌貓、狼、狐狸等身上。而生絲蟲進入宿主身體後，會寄生於宿主既心臟及肺動脈系統，損壞心臟、肺臟血管及組織，嚴重者會死亡。

預防方法：
一般預防心絲蟲既方法有兩種: 一年一支針 / 或每個月餵食心絲蟲藥 or 滴心絲蟲藥。
以上兩種方法都非常有效預防絲蟲，可以按醫生建議而去選擇。

• 跳蚤

屬長翅目蚤下目，一般會出現晌沙、裂縫及床單位置，有機會就會寄生晌宿主(貓狗為主)身上吸血產卵，跳蚤影響冇上面兩種咁嚴重，主要帶黎都係皮膚過敏等影響，不過都相當麻煩。

預防方法：
市場上有多種預防跳蚤既噴霧、口服及滴劑選擇，有一次性又有每月用，可以問清楚獸醫意見先選用。

2. 選址
當決定帶埋毛孩去camp時，選址係極度重要！要選擇：

• 路程較短

作為主子，要準備自己野加埋毛孩既野已經相當重，所以盡可能揀路程在15-30分鐘內距離，對主子同毛孩都比較好，就算可以車直到既，都唔好揀車程咁長，唔係隻隻毛孩鍾意坐車的。

• 少人或唔影響人

雖然毛孩係好可愛，但難保有其他營友係怕佢地 or 唔想俾佢地影響，畢竟有部份毛孩地盤意識好高，當有其他人行近或經過都可能好大反應，為免大家有所不快，都係揀D唔太影響人既地方比較好。

• 有退出點

毛孩同人最大分別，係有咩事唔識講出黎，當佢唔舒服時先發現時，就可能太遲，所以建議去有退出點既地方，有咩事都起碼可以出返去搵車先。

• 短草地為佳

沙灘唔係唔好，不過近年沙灘垃圾太多，又多沙蚤，而短草地相對之下需要顧慮既野比較少，清潔也比較方便，適合初哥多Ｄ。

3. 帶上狗帶，保持視線範圍
明白大家都想毛孩去到戶外都可以自由自在，但畢竟戶外有相當多其他野生物或其他使用者，一個唔留神令到毛孩或其他人受傷就唔好了，除非你家毛孩受過訓練可以保持在視線範圍內，否則一論建議為人為己，帶上狗帶。
PS. 有朋友的毛孩已經相當有經驗，亦都受過訓練唔會離開身邊。但結果有一次去camp，毛孩去左堆人既排泄物上面玩，當晚成身都係排泄物味。

4. 性格
畢竟毛孩經過幾百年既進化之後，已經變得唔一定適應戶外生活，例如唔習慣晌戶外大小二便、用膳、甚至變得好敏感唔肯訓等等，所以唔係每一隻毛孩都適合露營的，可以先去幾次野餐試下先俾佢習慣下，同時帶佢地平時訓既睡墊或尿墊去，增加其安全感。

5. 飲食衛生
因近年戶外衛生程度大減，所以要留意毛孩既進食同埋水源，唔好俾佢地飲用未過濾既溪水或將食物放晌地上，更加要留意毛孩八卦緊D咩，隨時可能係玩緊其他人既排泄物紙巾。

毛孩相當可愛，但戶外都相當多需要注意既事，唔好以為自己露營經驗豐富就足夠應付，本老hike第一次帶毛孩去camp時，隊友都笑言「第一次見到你咁狼狽」，不過見到毛孩咁開心，幾辛苦都值得既。

#經驗分享
#户外攻略
#老hike都去camp