户外常見動物 - 蚊、蠓編

蚊、蠓，絕對係camper最討厭嘅生物頭三甲 ，不論新手老手都必定用盡一切辦法去驅趕佢哋。正所謂知己知彼百戰百勝，所以分享一下，蚊同蠓嘅特色同分別。

• 蚊

根據資料，全世界有約3,000種，單計香港，就已經錄得超過70種唔同品種嘅記錄，而常見的有中華按蚊、多斑按蚊、白紋伊蚊、致倦庫蚊和三帶喙庫蚊等十幾種。

蚊係屬於完全變態嘅昆蟲，佢哋嘅卵會產在水邊，一般到達成蟲階段要14日，不過如果25℃以上嘅天氣嘅話，只需要10日就完成，所以說明咗，點解夏天會比較多蚊啲，同時，蚊喺10 ℃以下會停止繁殖亦會大量死亡，形成一個冬天少蚊嘅現象。

至於蚊喺吸食方面，絕大部份嘅雄性蚊都係靠食植物樹汁。雌性就係吸食其他動物如: 鳥類、爬行類、哺乳類(包括人類)等血液，但雌性蚊吸血唔係為咗維生，只係為咗血液入面嘅蛋白質用黎交配後產卵，而雌性蚊搵目標係靠獨特嘅感應器(類似熱感)，會透過對二氧化碳、熱能同汗水去搵目標，然後再用細長嘅喙去吸食，但因為佢哋嘅口水會令皮膚出現皮疹，所以大家俾蚊叮完都會覺得痕嘅原因。

• 蠓

蠓全世界有約6,000種，而香港已知嘅約有57種記錄。

同蚊一樣，蠓都係屬於完全變態嘅昆蟲，亦同樣地，佢哋繁殖同溫度係相當大關係，一般只會在夏天產卵、繁殖，到冬天會以卵嘅形態過冬，所以冬天連蠓都會無乜。

而蠓同蚊嘅吸食習慣係接近一樣，都係雄性吸食樹汁，雌性為蛋白質產卵而去吸血，不過不同嘅係，蠓無蚊嘅喙，換黎一個相當發達嘅口器，用黎切割開皮膚吸血用，所以被蠓叮咬係非常之痛嘅。

蠓飛行能力唔強，一般只會喺佢哋嘅棲息圈300米內，仲要無風、溫度啱，有光線下先會出現，不過一出就會成群出現。另外佢哋本身生命都好脆弱，喺乾涼、低溫（10 ℃）嘅天氣下都好易死亡，所以一般離開佢哋範圍都安全。

因為蚊同蠓主要都要依賴水源的，一般水源附近都會比較多蚊同蠓，所以喺營地選擇時候都要同水源保持一定距離。而防範方面，市場上都有唔少驅蚊用品出現，詳情可於 https://oldhikegocamping.blogspot.com/2020/06/blog-post_46.html?m=1 延伸閱讀。

#戶外常見的動物
#户外攻略
FB: 老hike都去camp
MeWe: 老hike都去camp