户外常見的動物 - 野豬編
野豬，令一眾香港camper聞風喪膽嘅動物。只要資深少少嘅camper都一定見過甚至受過野豬騷擾，好彩嘅就只係垃圾散落一地都係，唔好彩嘅話，拖走背囊、𠝹爛營幕、偷走食物袋都經常發生。唔想發生啲不幸事侏，就要先了解野豬嘅特性之後去避開。
野豬屬雜食性動物，上至野兔下至果實都可以當糧食，而主食糧係植物嘅根部，為咗方便搵到肥美多汁嘅根部，野豬天生就有一個非常敏銳嘅嗅覺，個敏銳程度係去到法國獵人都用佢哋黎搵黑松露，所以將食物放入背囊等做法，係完全呃佢哋唔到的。
除咗靈敏嘅嗅覺外，雄性野豬仲擁有長獠牙去保護自己，雌性雖然無獠牙，但同樣喺必要時都會用自己長達3cm嘅犬齒去保護自己。另外唔係睇野豬成200kg重就好笨拙，佢哋最高速度可以達到40km/h的，唔止跑得快，佢哋游水仲好叻，所以好多外島都會出現佢哋嘅足跡。
加上野豬屬群體活動，只有虎及狼群等先有資格做佢哋天敵，雖然係咁，基於對人類嘅未知，所以天生係會驚人類的。但當野豬極度飢餓或者極度恐慌情況下，都一樣有機會攻擊人類。另外，如果幼豬受到騷擾，母豬一樣會不惜一切去保護佢哋。
然而野豬攻擊性強，身型龐大，又傳生性兇惡。但其實天生非常細膽，遇見人類時多數會避開，唔會主動攻擊。無奈近年香港左膠當道，不少人主動接觸野豬甚至餵食，令到野豬放低對人類嘅戒心，導致佢哋會主動行入人群搶食(塔門情況更甚)。
所以為咗預防搶食發生，請:
- 露營時將食物及垃圾袋紮好及吊起至離地約1.5米高
野豬雖厲害，但佢都有一個缺點 - 唔叻跳高，所以只要吊高到佢獠牙接觸唔到嘅地方，基本上都安全。
- 不要將食物放入營內
有部份人以為，收入袋再入營就可以防止被搶。以前野豬仲驚人時都仲可能得，得嘅原因唔係因為冚到食物味，係佢哋仲會同人類保持距離。經過多年餵食後，野豬再唔驚人，營都𠝹開你，袋都偷埋你，加上上面都有講，泥下啲黑松露佢哋都搵到，區區一塊布，又點會阻到。
- 焚火台可保平安
野豬嘅嗅覺唔止幫佢哋搵食物，仲要黎探索附近有冇異樣，而柴火燒出黎嘅味，正正係佢哋驚嘅野，畢竟喺野生動物世界，火係可怕嘅事情黎。
如果不幸遇上，請勿做任何刺激到野豬動作，例如: 大嗌、拍打甚至攻擊，只要保持距離，佢哋就自然會走。更加唔好再用食物引開，只會令佢哋認為有得討食，不停來回騷擾。
其實野豬食物種類繁多，我哋人類無需要為佢哋擔心糧食問題，更加唔使餵食，請同野豬保持返應有距離，令野豬對人類有所戒心，咁自然被野豬搶食的情況減少，大家都會放心啲。
留言
發佈留言