知識分享 - 失溫症

失溫症，又名低溫症，大眾認知，失溫症係因天氣寒冷所引致，但其實失溫症係因為人體熱能大量流失，核心區體溫降低導致的一連串病症。

輕度失溫時會身體發抖、意識模糊，手腳開始發僵，體徵正常。

中度時發抖會消失，意識模糊加劇，手腳開始做唔到協調動作，及反常行為如除衫。

重度時失去活動能力，皮膚呈藍紫色及會腫脹，思維混亂，瞳孔擴張，脈搏速度變慢，進入冬眠狀態，最後就係死亡。

失溫，可能會諗只係冰天雪地先會出現，或者出現喺寒冷天氣下，但其實失溫症唔單止會出現喺以上地方，就算係香港炎熱嘅夏天都一樣有機會！

能造成大量熱量流失的原因有:

• 地面吸走

根據熱傳導原理，熱能會由高溫向低溫轉移，所以我哋訓喺地下時，熱量會俾地面吸走，初時唔會好覺甚至覺得舒服，但當去到深夜時分，就會覺得寒冷，再加上高山/落雨/無足夠衣服的話，都有機會導致失溫症。

• 水流走

不論汗水、雨水或玩澗後嘅水，水比起空氣高足足20倍熱傳導率，所以濕身後會都會增加失溫症風險，另外因為濕咗嘅衫轉乾嘅過程中，都會產生汽化熱(水轉水蒸氣嘅現象)吸走身體熱量。

• 對流帶走

無風之下，身體會發出熱氣令皮膚感到溫暖。有風時，風就會帶走層熱氣，隨風速越來越快，帶走越來越多，身體會越來越凍，就越易出現失溫症。

以上三樣同時發生的話，就算係炎夏，都一樣會出現失溫現象的，當真係出現失溫徵狀時就要: 

1. 換上乾爽衣服

要時常準備一件後備衣服，就算無，都唔好再著濕咗嘅衫，因會不停吸走熱量，增加病情。

2. 盡快加穿衣服或使用太空毯

雖然，出現失溫症後再加穿衣物都唔會增加到身體上熱量，但可以減慢流失熱量流失，增加生存率。

記緊，唔好除自己衣服俾傷者，因為如果隊友有事，代表身處嘅地方係存在失溫風險，所以有機會令自己同時陷入危險。

3. 食熱食或熱量棒

增加熱量係最佳補命方法，食熱食唔止令身體補充到熱量，更令心靈得到滿足，意志係最重要。

4. 做適量運動

如果仲係有發抖反應，可以做適量運動增加熱量，但如果做完都無幫助，要盡快落山求救。

其實仲有好多原因會增加失溫症風險，如酒精中毒、低血糖等，都會有潛在危機。日前本老hike就有朋友於徒潛期間因天雨關係出現失溫情況，好彩係即時可以接走，否則可大可小。

#知識分享
#户外攻略
FB: 老hike都去camp
MeWe: 老hike都去camp