經驗分享 - 領隊

一個團隊，領隊就係成團人核心，一個好嘅領隊，可以幫團友平安又盡興地完成旅程，但一個唔好嘅領隊，好易發生意外及未能完成行程。
雖然攪手可能只係想做一個召集人嘅角色，但喺參加者眼中並唔係咁睇。曾經有試過一隊山隊，隊友出事後告個領隊無講明個風險，所以當領隊相當唔容易，仲有不少事項要注意，老hike今日分享下做領隊的經驗。

• 需事前了解路線難度

大多數會跟團的隊友都係比較經驗淺，或者對當地陌生，好多時都係靠領隊嘅解說去衡量當日情況，所以領隊對當日路線嘅了解、難度嘅準確性相當重要。亦唔好胡亂將路線評級，未去過嘅，都係跟人去一次先再帶人去吧。

Ps. 唔係唔鼓勵隊友自己做功課，不過會做功課嘅隊友又何需跟團呢

• 需注明活動目的

每一個活動都必定有佢核心目的，例如: hea camp、glamping、UL、全走time attack等，喺招募隊友時要講明活動目的，免得到時唔啱玩大家面阻阻。

• 需事前了解隊友能力

除咗要了解路線，了解隊友都同樣重要！因為經常有人越級挑戰，令到成團人進退不得，甚至要搵飛行服務隊幫手。

所以要了解隊友能力，減少意外發生機會。

• 需提醒隊友注意事項

鑑於join得團都係比較新，所以可能有甩漏甚至係無諗過需要。作為前輩嘅你，有責任提醒新手要為當日活動特別需要準備啲咩。例如，提醒天熱需要風扇、天凍要準備幾度睡袋、有無水源、當地多蚊、路程需要手套等。

需設check point及預計分段時間

如果條路比較長，就要set分段時間、休息時間、打卡時間等，例如:

0900西灣亭
1000西灣食豆腐花、影相
1045再出發
1200咸田食lunch
1330再出發

以上安排好讓隊友知道路線需時幾多，可以快腳先到cp，亦可以管理到啲打卡相時間，更可以差唔多腳速前進。

明白好多時host只係想搵人一齊玩，唔係咁想攪咁多野，但無奈依個就係攪手責任，如果怕麻煩，建議去跟團好啲。

#經驗分享
#户外攻略
FB: 老hike都去camp
MeWe: 老hike都去camp