知識分享 - 營地草地保養

露營最理想嘅地形必然係草地，軟軟的地形配合短草形成一個天然地墊，就咁訓落去已經好舒服，加上喺草地上野餐、煮食、打卡更爽。
但其實露營對草地或多或少做成一定嘅影響，例如妨礙草地進行光合作用、將泥土壓實令草披難再生長等。

以往，官方營地有專人養草(好似係)，所以大家玩完就咁走，將責任交俾其他人。無奈官方營地遲遲未開，一眾camper轉戰無人打理的x位，但人流太多，草披無得休息，令到某啲位置光禿禿了，所以分享下，如何自發保養草地。

喺開始之前，先戴個頭盔，草地護理絕對係一門專業知識，唔係簡單分享就學識，所以以下分享只可以幫到草地回復，唔可能種出草地。

• 淋水

眾所週知，植物係需要水份去維持生命，但水太多又唔得，水太少又無作用，幾多為之最好？專家指出一周要淋2-4次，每次嘅水要流入泥土10-15cm先有效，換算下，一個2人營位置就需要淋3L水，所以每次離開前，都為自己使用過嘅地方補回水份。

• 施肥

除咗水份，草地亦需要養份，所以施肥係一個好主意，但施肥都相當有學問，如:仲夏唔應該施肥、牛糞應用黎堆肥而非施肥等。
可以用炭灰、草木灰等常見的「碳酸鉀」去施肥保養，能令平衡土壤入面嘅ph值，更可以增強光合作用效果，一舉兩得。

注: 並非指燒地

注2: 炭灰影響外觀但唔代表會影響環境發展

• 打窿

泥土唔單止需要養份同水份，仲需要空氣，因為我哋訓過一晚之後，泥土被壓實，影響通氣狀況，所以可以離開前幫地下打幾個空窿，增加通氣同施肥效果。

雖然露營地點係公眾地方，但香港是你家，本老hike唔奢求大家會幫手保護，但希望唔會幫手破壞，香港真係好靚架！

#知識分享
#户外攻略
FB: 老hike都去camp
MeWe: 老hike都去camp