知識分享 - 地形應對

露營，係指在户外地方過一晚夜，有時真係迫不得已要喺啲非理想嘅地形上紮營的，咁如果真係要面對依個問題時，就先要了解有機會遇上嘅地形。

• 草地
  
  
  

草地係最常見地形，一般只需要搵平地就已經好舒坦，但都要留意附近有無蟻巢、係咪低窪地區、近唔近溪澗等問題，營釘最好可以用全入地如7字釘，以防草面遮蓋咗釘尾後睇唔到而發生意外。

• 長草地
  
  
  

不太適合紮營，因為長草位下多蛇蟲鼠蟻等窩藏，如必要時，要留意下面有無樹枝插穿個營，同注意生火，營釘都要用全入地的，以防意外。

• 泥地
  
  
  

完全唔適合紮營，泥地隨時會深陷，令自己陷入危機，同時清潔方面非常麻煩，營釘要用長形如沙釘、雪釘等高抓地能力嘅先比較好。

• 沼澤地
  
  
  
  

外貌係似平草地，但一踩落去就會賴野，唔可以紮營。

• 石地

石地有一危險性，就係𠝹爛、磨爛營底，所以必須用Oxford布等做嘅footprint去保護營底。同時因為石地唔舒服關係，睡墊要用比較厚身上墊高自己同隔地氣。營釘方面唔太建議用，因為石地唔會自然修復，如真係要用，要用比較堅硬如鍛釘、棺材釘等。

• 沙地
  
  
  

沙地好舒服，因為屬可移動地形，只係清潔比較麻煩，又有沙蚤出沒。營釘要用沙釘或雪釘等先安全，最好用石頭或沙袋，不過用後記住放回原處，同時要留意潮汐水線，唔好太出。

• 雪地

香港無乜機會遇到，如果去外地，要注意睡墊R值，營有無雪裙等。營釘方面，必須用長雪釘，唔好懶！因為雪地氣候變化得太快，安全最緊要。

發掘營地時，最重要識得留意地形，唔係度度地方都適合過夜，玩還玩，安全最緊要，同時要做到LNT，咁先可以保護地點等下一手都可以享受同等環境。

#知識分享
#户外攻略
FB: 老hike都去camp
MeWe: 老hike都去camp