露營side track系列 - 掘蜆守則

夏天，好多營友都會大魚營地如貝澳、籮箕灣等地方露營，又會掘下蜆加料。

但又知唔知，其實掘蜆係有守規的？

首先講咗，點解要有守則保護啲蜆先，係咪因為環保撚上身。

蜆類喺大自然內，係擔當一個filter 角色，主要係過濾同潔淨海水之用，所以掘太多蜆，係會直接影響海洋生態、海水質素同泥灘嘅生態發展。

所以為咗減少掘蜆對環境嘅影響，世界自然基金會 WWF 同大嶼山居民制定咗自願遵守的「掘蜆守則」。希望大家自律，減少對環境嘅破壞。

1. 細蜆長留 ─ 不要帶走體形太小的蜆隻（請參考「蜆類保育尺」）

細隻都無肉食，放生等佢成長同繁衍，咁先生生不息。

2. 知足常樂 ─ 只取走足夠自己食用的蜆隻數量

唔好為掘而掘，夠食就算，留返啲俾下手或者下次自己。

3. 輕裝上陣 ─ 使用破壞性較低的掘蜆工具

掘蜆唔係打仗，唔駛大殺傷力武器嘅，小泥耙好了。

4. 填返個氹

填平返可以加快泥灘復原，又可以保護返泥下嘅生物唔駛曬死，又避免有人行過kick親

5. 愛護紅樹 ─ 避免在紅樹林前緣及河流中掘蜆

掘蜆啫，唔係掘樹根，行遠少少啦

6. 尊重生物

尤其是水口泥灘的馬蹄蟹，近年越來越少，所以唔好攪佢哋

7.  小心潮漲

可以上天文台查閱，因為會潮得好快，預時間執野離開。

8. 不留痕跡

任何户外活動都需要LNT，自己垃圾自己帶走

以上就係掘蜆守則，當確定可以遵守時，就可以去掘蜆了。

掘蜆都有好多野需要準備:

1. 季節

通常每年7-10月都係當造時節，可以夾啱日子去

2. 潮退

因為大蜆會出沒喺深水環境，所以夾啱潮退時間，收獲更好，如果揀啱初一十五大潮更佳。

3. 防曬裝備

因為需要一段時間喺陽光底下活動，防曬準備必須做足，建議用防曬衣，免得忘記補太陽油。

4. 水鞋或密頭鞋

因泥灘常出現蠔殼，所以要著保護到腳趾的鞋，切勿拖鞋。

5. 矮櫈(三寶之一)

免得坐得太辛苦。

6. 泥耙(三寶之二)

作用唔駛講。

7. 水桶(三寶之三)

可以將收獲取走。

至於掘嘅方法好簡單，可以用枝竹或長身條狀篤入泥，中硬身就掘上黎，之後放入水桶就完成。

希望大家玩還玩，都要玩得有manner，祝大家收獲豐富，餐餐添食。

#户外攻略

#老hike都去camp