裝備測試 - 濾水器
香港露營,濾水器係咪必須,就見人見智。
但一般而言,任何水老hike都會過濾後先飲用,尤其係溪水。所以我哋今次就比較下幾隻filter邊隻表現較好。
喺比較之前,要知道香港水質本身係點。
就政府2018年嘅河溪水質評級報告指出,有 83%的監測站水質被評為「良好」或「極佳」評級。
但唔代表安全飲用,因為溪水有可能含有動物排泄物而有大腸桿菌E.coli,又可能有沙石有葉等雜質,甚至有阿米巴變形蟲 Amoeba。所以政府都叫唔好飲未煲過嘅溪水。
了解完之後,就要了解埋filter 需要注意嘅地方。
安全性:
大部分filter 都聲稱可以過濾到0.1micron 嘅野(amoeba 1micron) 同99.99999% e.coli 等細菌(應該係頭盔mode 唔敢講100%) ,喺香港夠做了。
本老hike 用咗filter 後,3年都無煲過水黎飲,期間唔知用咗幾多L水,所以相信係安全嘅。
Filter 壽命:
每個filter 都有佢maximum過濾水嘅壽命,至於係咪會count住已經用咗幾多L ? 應該無人會吧? 最簡單就睇出水速度有無明顯變慢或水質有無明顯問題,不過有時都關乎有無清潔個濾芯,如果洗完情況無改善,換得了。氣味:
雖然0.1micron係足夠過濾到重金屬,但殘餘味道除唔到,所以部分filter 會加入活性碳,而改善氣味同味道。Flow rate:
指每分鐘可以過濾幾多L水,官方數字只供參考,因為實際會受水質、吸/壓力、甚至filter清潔程度影響。接駁口大細:
影響到filter 可以接駁到咩地方,水袋、樽、直接飲用等。清洗方法:
因為filter係需要清洗的,所以方法太煩,會影響到個清洗意慾。
以下會做4隻市面容易購買到filter 做比較(budget有限,只能試到有限款式)
Sawyer mini
100奈米的濾芯可過濾99.99999%的細菌及微生物,如沙門氏菌,霍亂和大腸桿菌,鞭毛蟲和隱孢子蟲等。
過濾孔徑達0.1微米,高於美國EPA及NSF標準
評價: 出水慢,勝在夠輕同方便,可以28mm口徑可以安裝落好多水袋或水樽,行山縱走都會準備喺身。
Lifestraw flex
通過NSF 53標準,能有效減少鉛及其他重金屬
通過NSF 42標準,能有效減少氯氣
通過US EPA飲用水標準
評價: 出水慢,大舊,當水線矮過filter就極難出水。不過容易清洗同有碳濾芯吸味,同樣用28mm口徑,可安裝地方多。
Befree katadyn
評價: 出水速度相當出色,清潔濾芯非常方便(喺水中搖一搖就得),但口徑比一般樽大,只得用原裝3L袋。(過完嘅水唔知點解有人話有鐵銹味)
Sawyer squeeze
評價: 出水好快 (唔知點解有人話會過濾到訓著),原裝水袋好用(不過易爛),細、輕、方便,同樣用28mm口徑,用途極多 ,不過洗就要啲技巧。
之後就係佢哋過濾600ml水嘅實測時間
(測驗非專業,會因水質、filter新舊、方向等有所影響)
連結: https://youtu.be/j7YUhqjnsRc
最後,就算過濾過嘅水,都最好煲過先用。市面仲有大量唔同牌子嘅filter可供選擇,以上實測並非推薦以上品牌,只係分享用過嘅brand,資料只供參考之用。
留言
發佈留言