知識分享 - 危急處理
最近天氣開始熱了，不論hiking、camping、picnic都開始辛苦，我相信有部份人係唔會收季，但當自己身體出現異樣，又會唔會識點做？
利申: 以下非標準教學，如需標準教學，請到各團體報讀急救課程。
1. 熱衰竭/中暑
好多人將兩樣野混淆。
中暑係閉症，即係身體過熱而散唔到，身體氣機不暢而昏歇不醒人事
而熱衰是脫症，因身體體能或營養水份透支過量，而出現虛脫症狀
（以上只是簡單解釋分別，詳細要再解釋落去，當然搵教授醫生解釋或更佳）
中暑正常已經暈低咗，亦唔可能自然回復到。
熱衰竭症狀有:
體溫上升、頭暈、大量出汗、臉色倉白、想嘔、肌肉抽筋等。
如果無即時處理，就有生命危險。
處理方法:
先將患者移到蔭涼位置，例如樹蔭、涼亭、銀底天幕下，無嘅話用傘都可以。
之後墊高雙腳，等啲血充返上頭。
如果可以，就飲大量電解質或清水。
休息過後就無事。如果持續頭暈，就報警求助。
2. 拗柴
即係足踝扭傷，成因唔解釋了。處理方法記住四個英文字: R I C E
Rest 休息: 停止活動，休息下先。
Ice 冷敷: 用ice pack 減輕痛楚。
Compression 加壓: 用繃帶固定同時加壓紮住佢。
Elevation 抬高: 如果啱啱傷，唔影響傷處下可以抬高對腳，等血液回流，有助消腫。
注意: 依啲只係緊急處理，回到市區要盡快求醫，否則手尾好長。
3. 抽筋
抽筋成因通常都係熱身不足或缺水做成。
唔同部位嘅抽筋處理方法都有啲唔同，不過都係行埋一邊做伸展運動(拉筋)，之後飲返水就得。
4. ITB
IT band 骼徑束症，簡單去講，膝外側痛。
成因係突然比平時行長咗或耐咗，當肌肉唔夠力時，用上膝蓋力，之後就會有ITB。
所以當長征時，要準備大量food bar，唔可以因為餓導致肌肉無力引致ITB。
不幸ITB，可以拉筋或用鎮痛貼頂住落山。
最不幸係，當ITB出現，最少要休息2星期.... 所以預防勝於治療。
5. 出血
曾經見過有人去camp竟然𠝹到自己流血不止..... 而竟然唔識去處理傷口....
首先要將傷口抬高(骨折除外)，之後清洗傷口，用消毒藥水或生理鹽水清洗後，敷上紗巾/衛生巾等用品，並用繃帶加壓紮住。
如果都係止唔到血，要盡快求醫！
緊急處理並唔係治療方法！
只係頂住先等大家唔駛叫飛行服務隊，落返山都一樣要聽從醫生建議，否則手尾好長。
後記: 其實每次出post都好擔心被haters or 其他page捉錯處。so far 開咗三個月左右大家都對老hike好好。
今日雖然上咗新聞庫，但文中都係友善的通知。所以老hike都感謝新聞庫、fitz等專業page留意本page。
日後本老hike依然會分享一啲個人知識同經驗，如果有咩唔正確嘅地方，歡迎指正，等本page可以成為宣傳户外技能的一員
留言
發佈留言