知識分享 - 冰箱的選擇

夏天露營，如果有冰凍嘅飲品，係好爽一件事，所以好多時都會用到冰箱，咁冰箱應該點揀呢？

 Ps. 保温箱唔係雪櫃，唔係會雪凍啲野，只係將箱內溫度維持耐啲。所以請早一日準備將需要的東西雪好，切勿去到當日先用冰箱雪，多多冰都唔夠你用

1. 用途
有人會露營釣魚，有人會煮大餐，有人會為求上山hea下，有人會劈酒，唔同情況下，用嘅冰箱都不一樣，所以諗清楚自己用途先。

2. 容量
揀好咗自己方向，就要諗容量，因為容量同重量係掛勾，以本老hike為例，本老hike係啤酒當水飲，最少都一打起標，加埋食材、冰塊等，要用26L先夠做。

3. 保冷能力
冰箱保冷能力係一個冰箱嘅核心，用真空隔熱或銀底保冷黎做成。通常用時間黎做基準。30h、70h、90h都有，時間越長保冷能力越高。

4. 款式
冰箱有分: 充氣式、發泡膠式、硬身真空式、軟身式等

• 充氣式(迪卡農)

收納方便，重量偏輕，但車線位會漏水，即係雪氣會走，加個內膽可以增強保冷能力，但依然會受外邊溫度影響，所以唔可以擺喺太陽下。

• 發泡膠式(街市魚檔)

最輕，保冷能力又高，同時最平
可惜唔方便拎，又易爛，加上唔環保，唔太建議

• 硬身真空箱 (釣魚箱)

最重，同時最保冷。唔同牌子嘅保冷能力不一樣，要睇牌子，常見係daiwa同shimano，不過入場唔平，coleman就抵玩啲，但效果高下立見。同時硬身箱可當枱櫈之用，比較multi-use。

• 軟身(foodpanda)

方便，平。
但保冷能力麻麻，只適合短時間用。

5. 重量、方便性
講真，用得冰箱，就必定重裝，雖然老hike去要行嘅地方會換個foodpanda袋算，但重量不作考慮之中。

其實冰箱非必需，如果兩日一夜，食材通常第一晚已處理，第二朝午都係罐頭或比較輕食多，無需要增加自己重量。
食材可以雪成冰，之後用報紙包然後入哈根大師個袋，一樣可以夜晚都keep到凍。
要增加冰箱保冷時間，又可以用毛巾幫冰箱分層。打爆冰及減少打開冰箱都可以增加保冷能力。
雪種可以用水雪成冰，第二日又有水飲，減輕自己負擔。
工具係死，技術係生，唔駛成日諗買野嘅。
#户外攻略
#老hike都去camp