知識分享 - 山鞋的選擇

本老hike除咗露營外，仲會行山，甚至越野跑，所以對山鞋要求都比較高。

知好多camper都係著普通波鞋就去camp，因為都唔駛點行嘅camp site多。

但如果想去啲比較特別嘅地方，如: Eason 山打卡、喺咸田無野好做行轉蛇尖等。

山鞋就幫到你了。

選擇山鞋先要睇自己咩用途先

因為行山鞋、越野跑鞋、澗鞋，已經係三類唔同嘅鞋。

鞋要揀選

1. 高/低筒

高筒保護性高啲，以防唔習慣孭袋下上落山唔平衡而抝柴風險，但又失去咗靈活性。

低筒就反之然，自己衡量。

2. 鞋底防滑

一對山鞋咬地同防滑好緊要，通常都想搵一對抓地力強同時又防跣嘅鞋，咁就要留意三點: 膠底、坑紋、釘。

膠底:

常聽到嘅有Vibram、Stealth、Premium Wet Traction Contagrip等

V底，應該買過山鞋都會見過or試過佢。評價好壞參半，因為遇上濕地都有人話跣。其實v底只係一個牌子，其中v底入面嘅megagrip先係啜地。

Five ten 專用底，相信行開山嘅對five ten 依對「澗鞋」，應該認識的。

Stealth嘅鞋底好軟，同時行山時會受熱，令到鞋底好似溶溶地咁痴住個地下。

Salomon 專用底，由s-lab開始轉用，打算一洗就salomon跣到hihi嘅形象，同樣係軟身底，利用膠面啜地。

至於釘同坑紋就易記好多，釘厚而坑紋深又多方向，就咬實沙泥，如果釘太薄，踩落去易跌親，坑紋愈深，就愈適合凹凸不平的路。而釘越軟身，就越配合至上面嘅鞋底。

通常抓地力愈強的鞋底，就愈快磨蝕，較唔耐用。唔好俾啲sales呃到你。

3. 防水

有部分人揀鞋時仲會考慮到防水能力，例如有無gore-Tex等。本老hike經驗係，gtx係行雪地先用得著，香港行山著防水鞋又焗腳，入咗水仲好難乾。世上應該未有一種物料係防水力好仲要透氣的，所以都係選擇透氣舒服好多。

當揀完以上三點後，就可以試鞋。

試鞋最好著厚襪去，因為好多時行山都會著行山襪，另外鞋要買大一碼，因為行山對腳會因血腋循環而脹咗，同時又會因為落斜導致腳頭受到衝力，所以買大少少，俾啲空間自己。

鞋真係好個人，一定要自己試先知自己適合咩鞋，要對對鞋有信心。搵到一對啱自己嘅形號，一世都唔會轉。

利申: 本老hike為Salomon speedcross fans.... 因為中資收購了，終於要轉會😭😭。

#户外攻略

老hike都去camp