經驗分享 - 收季

香港天氣，熱起上嚟真係好熱，凍起上嚟真係好凍，長年濕度高令到體感溫度更凍/熱，所以春季完結後，好多Camper都會收季，亦係比較少人露營嘅時間。

喺露營界，收季唔單止係唔去露營嘅意思，仲代表住好幫露具做清潔保養嘅意思，如果唔係下季拎出黎用就會有陣味同埋已經爛、壞咗，加上有效嘅保養，係可以延長Gear嘅壽命。

• 營

雖然視覺上，隻營仲係好靚好乾淨，但其實喺布入面已經有唔少嘅污垢，尤其是：

海邊露營後
高鹽度嘅海風係會腐蝕拉鍊同鋁桿，如果有沙更加會對布料做成傷害。

Camp Fire後
柴火所產生嘅煙霧入面有大量懸浮粒子，懸浮粒子會痴住喺營布面上，影響布料嘅通風能力。PS. 香煙都會產生懸浮粒子

雨後
雖然雨水好似幫手洗營，但實際上雨水會帶住空氣中嘅雜質降落到營上，之後再經太陽嘅紫外線下印喺營上，令到更污糟。

洗嘅方法好簡單，首先要搵一枝中性清潔劑，唔建議用洗衣粉。同埋一個浴缸，如果屋企冇浴缸可以用一個大桶代替。

首先放一缸足夠冚過隻營嘅凍水，加入中性清潔劑後放隻營入去再攪拌五分鐘，之後就浸大二十分鐘左右就拎出黎，如果流出黎嘅水係棕色就重覆以上動作直到流出嚟嘅水變得乾淨就完成。千奇唔好用洗衣機洗，除非你想隻營同洗衣機都換新。

洗完之後就可以晾乾佢，或用有低溫功能嘅乾衣機。再幫佢重新噴上DWR(防水)，之後等佢完全乾透就可以收埋，但收藏地方必須係「乾燥、陰涼、通風」否則下次拎出黎會生晒霉菌仲會有陣味，更加唔好放陽光直射到嘅地方，因為紫外線會破壞加速老化。

• 睡袋

睡袋作為貼身物品，經常性會沾上汗水、皮膚油脂等，所以洗嘅頻率建議最少一年一次，如果用得多就最少一季一次。洗嘅方式有兩款

淺層清潔
攤開睡袋用布加中性清潔劑擦，同時可以檢查有冇破損地方需要修補，如果遇到擦唔甩係污漬，可以試下用牙刷配後中性清潔劑試試。

深層清潔
如果真係覺得好污糟的話，就可以用手洗、機洗（強烈建議手洗）。如果係羽絨睡袋，記住用返洗羽絨專用嘅清潔劑，洗完之後用羽毛球拍拍返鬆就得，如果用機洗，就記住放洗衣球以防佢痴埋一舊。如果係人造纖維就跟返正常洗滌程序就得，之後可以風乾或放入乾衣機用低溫mode烘烤，大約每二十分鐘就要打開檢查一下個溫度，因為羽絨係唔受得熱。乾咗後放喺「乾燥、陰涼、通風」嘅地方存放。

• 睡墊

同睡袋一樣情況，但今次唔駛咁複雜，只需要用酒精進行清潔，然後放喺「乾燥、陰涼、通風」嘅地方存放。

收季定義人人唔通，有人會等下個秋季先再恤髮，有人可能係等幾年有人再約先再恤髮，無論係存放幾耐都好，叫做俾個機會自己將Gear洗一次，等壽命延長啲，咁就可以長露長有。

Ps. 去沖繩玩，記住搵老hike租車

#露營品牌史
#户外攻略
FB: 老hike都去camp