知識分享 – 清洗Filter

上星期喺某討論區突然有個話題引黎熱烈討論 – 如何正確清洗filter。
所以本老Hike今次就分享下關於清洗Filter嘅經驗。

要知道點清洗之前，就要先了解Filter構造，雖然唔同型號嘅Filter構造唔一樣，但結構上面都係大同小異。

Filter原理好簡單，就係靠濾芯做成微細孔隙，將雜質、細菌等污染物隔離喺濾芯，通過到孔隙嘅水就會變得乾淨。有部份品牌仲會喺濾芯加入活性碳層，唔止將污染物過濾，仲連氣味都改變埋，所以依家去露營，Filter算係標準裝備之一。

但Filter亦唔係無敵，雖然市場常見嘅戶外Filter大多可以做到0.1微米(Mircometre)嘅孔隙，可以有效咁過濾到細菌、雜質等，但對只有10納米(nm)嘅病毒黎講都仲係寬過西隧，所以要有效解決埋病毒就要靠淨水丸。

而市面大多常見過戶外Filter都係用中空纖維黎做濾芯，中空纖維除咗可以做到微細孔隙外，擁有易清洗、輕、唔易變形等優點，所以非常適合做戶外濾芯。

喺使用Filter時，水入面嘅污染物會被濾芯嘅中空纖維隔除，久而久之，成中空纖維入面會充滿住污染物，將原來嘅0.1微米嘅孔隙，塞到淨返0.01微米甚至更細，唔止嚴重影響出水速度，仲感覺上相當唔衛生。
所以要定期對Filter進行清潔，清潔有兩個步驟要做，將濾芯內污染物清除、對中空纖維進行殺菌消毒。

• 污染物清除

方法好簡單，就係利用水壓將濾芯內污染物推返出去。只要將水從出水口倒灌入去就得，如果第一次做，就會發覺流出黎嘅水係泥黃色，咁就代表你成功，到流出黎嘅水變返正常顏色就已經完成。

• 殺菌消毒

但水壓只可以將污染物清除，一樣會有細菌、病毒等殘留喺濾芯內，所以要對濾芯進行殺菌消毒。常見方法將稀釋漂白水注入Filter內等一個鐘，之後沖水就可以。放心稀釋漂白水只要經過沖洗，就唔會對人體有害。

依家市場上仲有部份係有自我清潔功能嘅Filter，喺過濾期間會抽走部份水去做自我清潔，相當方便。

當然，唔同牌子嘅Filter會因為濾芯內嘅設計唔同導致清洗方式唔一樣，最好方法都係參考返產品手冊，唔好亂咁聽討論區嘅人講，好多人係「太監教洞房」

最後分享多個小知識。

一般家用Filter都會受環保署(EPA)監管(除某啲國家外)，但戶外Filter因為「只會短時間為使用者提供水嘅關係」所以EPA係冇對戶外Filter進行監管或測試。
好多廠商為咗增加消費者對佢哋信心，會將產品送去第三方實驗室進行測試，最常見嘅第三方就係NSF。

NSF (National Sanitation Foundation) 係一間非營利嘅獨立組織，工作重點集中喺水、食物、空氣和環境等對公共健康嘅影響同評估。NSF唔單止有同WHO(世衛)合作，檢測方式仲達到EPA水平，所以NSF認證係相當有權威。

常見嘅認証有

42: 擁有去除污水中嘅顏色、氣味、口感能力

53: 擁有過濾污水中嘅雜質能力

61: 保證會接觸水嘅物質完全唔會釋放有害物質

401: 擁有過濾藥物、除草劑、殺蟲劑等對健康有影響嘅污染物能力

P231: 擁有過濾微生物能力

P248: 擁有任何惡劣環境下都可以提供到安全飲用水嘅能力

日後選購Filter時，不妨留意下佢哋拎過咩認証

BTW，如果大家有咩想知嘅問題，都可以PM本老Hike，咁老Hike可能會針對你哋想知嘅問題詳細分享。
但.... 唔一定識答

Ps. 去沖繩玩，記住搵老hike租車

#知識分享
#户外攻略
FB: 老hike都去camp