知識分享 – Bivy

近年大家都為咗追求極致嘅UL，不惜以「屌地」方式露營，但其實有一種叫Bivy嘅shelter都可以做到極致UL，甚至比屌地安全、舒服，今次就由老Hike分享下。

Bivy sack中文應該叫露宿袋… ? whatever，就連英文都可以叫bivy ,bivi , bivvi , bivvy 等等，原型係叫bivouac，本身係法語黎，但後來德語用佢黎表示巡邏意思，簡稱Bivy。因喺戰場上不論地型、環境、時間等原因，冇可能搭建一個營出黎，亦太過招搖。所以前線士兵就會帶Bivy sack上戰場，為休息時間提供一個比較好環境。

Bivy嚴格上都唔可以稱為營，應該叫睡袋比較適合。以前Bivy只係一個防水睡袋套，因為就咁用睡袋訓戶外會令體溫不停流失，更受天雨、蚊蟲等影響，所以就加個防水袋喺外面，去解決以上問題，但又會因空氣唔流通導致Bivy內濕氣過重引致Bivy內發生冷凝。

初時解決方法係將bivy收緊到使用者個面部，留返個窿呼吸同觀察外面，當然依個做法令使用者相當唔舒服，使用者亦唔可以喺Bivy內呼吸，否則Bivy內依然會出現冷凝問題。

後來Gore-Tex嘅出現，令到Bivy解決到一部份冷凝問題，但使用者依然係唔可以將Bivy完全拉上，否則會缺氧同冷凝反應。所以就想到，喺Bivy嘅面部位置改用蚊紗，一黎可以增加通風效果，二黎面部亦唔需要曝露喺外面受蚊蟲影響。但又會出現另一個問題，蚊紗受風影響導致不停拍打塊面，所以又將面部蚊紗位置加繩，然後搵樹枝、雨傘、行山杖等將其吊起，令到蚊紗部份遠離面部，提供更舒適空間。

依家有部份Bivy甚至提供營骨，可以直接撐起蚊紗部份，用起上黎更加似個營。

Bivy最大特色係輕巧、收納細、開收快同任何地方都可以使用，所以喺惡劣環境或冇足夠空間起營嘅地方如雪山、岩壁上都發揮到佢作用，所以好多極限運動家都會準備一個喺身上而防不時之需。近年仲因為追求極致UL同Bikecamper等，令到Bivy更受歡迎。

如果想選一個Bivy，就要留意返

• 款式

上面有提過，Bivy大致有兩款，有營骨、無營骨。

有營骨
好處係搭建方便，唔需要搵任何野吊起個bivy就可以直接使用，不過Pack size就會比無營骨略大，亦因有營骨關係所以略重。

無營骨
雖然要搵地方吊起蚊紗，但其實唔吊起都係冇問題，因為危急時根本冇時間攪咁多，加上打開容易，收納速度快，Pack size細，所以以後備營黎講，無營骨版會比較適合

• 長度

一般Bivy 都有2米以上長，對亞洲人身高黎講應該問題不大，不過唔排除有高佬出現，如果長度唔適合，會相當唔舒服。

• 物料

因為Bivy就係預咗曝露喺戶外，防水、防風等功能缺一不可，更重要喺係防撕裂，畢竟會直接訓喺地下，如果物料唔防磨，就好快玩完。

除咗以上三點外，當使用Bivy更加要留意以下

• 睡袋

Bivy 因為防水關係，所以會為營內提供額外5-10℃保溫效果，但依然係唔足夠應付戶外環境，所以都要配合睡袋保溫。如果仲係唔足夠，放個熱水壺或使用太空毯。

• 睡墊

同普通營一樣，Bivy配上睡袋都係無法提供熱阻，所以一樣要配上睡墊保溫。

• 防水袋

因為Bivy內只足夠一個人嘅空間，連放個袋入去都做唔到，所以隨身物品如背囊等必定喺營外，如果唔想濕，就要考慮用防水布或防水袋將其他行李保護好，垃圾袋係一個唔錯嘅選擇。

雖然Bivy嘅外觀真係好似屍袋，空間又細，但以後備營或追求UL嘅情況下，Bivy不失為一個好工具，近年仲興起Bivy上再搭建Trap，DIY自己心目中嘅shelter。

Ps. 去沖繩玩，記住搵老hike租車

#知識分享
#户外攻略
FB: 老hike都去camp