知識分享 - 取暖

露營文化已經今非昔比，唔少人由徒步轉到car camp，裝備亦越來越現代化，由夏天嘅電風扇，進化到冷氣機，而冬天除咗原始嘅「圍爐取暖」外，都仲有其他現代方法，今日同大家分享下。

氣式暖爐
氣式暖爐係利用燃燒氣體，產生熱能，提供暖氣。好處係gas比較輕，使用場合無咁多限制，又可以定點範圍增熱，加上gas易搵又可以同爐具共用，所以比較常見。但效果就比較弱，同埋如果太凍情況下，有機會因氣壓問題而令致效果更差，所以不適用於高地。
同爐具一樣分卡式氣、高山氣兩款。
油式暖爐
油式暖爐透過燃燒煤油生火，利用火提供暖氣。油式暖爐唔單止體積比較重，仲需要準備額外燃料，但因為明火關係，所以大多都可以用頂頭煲水，都有一定fans支持。
油式暖爐分「反射式」、「對流式」兩種，反射式暖爐會製造暖空氣，令附近嘅環境升溫。而對流式製造嘅暖空氣會升上升，同空間內嘅空氣産生對流，提高空間溫度，所以比較適合室內用。
另外，因為油式暖爐係用明火關係，所以一定要小心使用，同一定要選有安全保護嘅款式，避免因意外撞倒而導致火災，亦要小心一氧化碳中毒。
電式暖爐
依家鋰電發展得越來越好，小小一舊電已經可以推得郁1000w以上，加上部份營地可以車入，喺電源方面完全唔駛擔心，所以造就成户外都可以用電式暖爐。
電式暖爐不單止安全，更加唔會產生一氧化碳，就算營內都可以安心使用。只要解決到電源問題，必定係最好選擇。

懷爐
懷爐係日文，原名かいろ，意思係指放喺懷中取暖嘅小型用品，其歷史最早可以追朔到17至18世紀，當時嘅人將砂石或鹽等加熱後用布包起再放身上黎取暖，之後去到1923年，由日本公司hakkin利用以鉑催化發熱嘅氧化原理，命名為孔雀懐炉推出，標榜環保、安全、耐用、經濟等。而之後最常見嘅即棄式暖手包則由1975年後相繼出現，都係屬懷爐之一。

懷爐大致分三種:

凝膠型
凝膠型同暖水袋原理一樣，利用凝膠等保溫物料製造成一個保溫袋，之後注入熱水令其凝膠溶化做成暖袋。方便但效果唔持久，所以都唔多人用。
充電型
即係常見嘅暖手蛋。利用電阻發熱原理，提供熱力去保暖。如上面所講，依家鋰電越來越輕，所以充電型亦越來越輕同持久，但充電型一直都有安全性問題，所以要挑選可信嘅品牌。
燃料型
利用鉑催化劑對燃料嘅化學作用令到爐身微微燃燒，喺鉑催化劑嘅支援下，唔單止可以令懷爐表面溫度保持約60℃~70℃，更可以燃燒6~22小時。雖然鉑催化劑係消耗品，但用一至兩年係完全無問題，乎合環保嘅意識。不過始終係燃燒中，所以必須小心使用。

暖包
利用鐵粉，同空氣中嘅氧氣同水份産生嘅氧化還原反應發熱。只需要拆開包裝袋，等暖包同空氣接觸後就會提供大約4-12個鐘嘅發熱效果，相當方便。更因為暖包含有鐵粉，就算發熱完結後都可以放喺衣櫃內作吸濕之用。
電熱毯
電熱毯內含加熱器，透過usb連接電源，只要有電，就可以提供熱力。如果真係好怕凍，又有能力拎嘅話，電熱毯絕對係好選擇，熱到出汗之選。選擇時要留意毯本身嘅質地、易唔易清洗、用咩方式供電、有無溫度調節等。
電熱服裝
唔單止有外套，仲有背心、褲等。同電熱毯原理一樣，不過可以著上身，要留意一無電就同裸裝無分別，唔好過份依賴。
柴火爐
最raw最有feel嘅圍爐取暖，非柴火爐莫屬，睇住啲柴燒到啪啪聲，係會上癮。依家仲有營設有煙囪口，可以將成個爐放入營內用。但亦要小心一氧化碳中毒。